Yiu di Yohana Salazar ta contradeci Laveist: Nunca a menasa bo!

A pasa varios siman caba desde famia di Leidy Yohana Salazar Lorza, di 40 aña y di nacionalidad Venezolano, a raport’e como perdi.

Dia 22 di maart 2023, el a sali di manera ilegal for di e peninsula di Paraguana pa Aruba. Su meta tabata ta pa reuni cu su famia cu ta biba akinan, pero Leidy Yohana nunca a yega. El a paga un ciudadano Rubiano, Robert Laveist 2500 dollar pa trec’e Aruba, pero door di motibonan di salud, el a encarga esaki na su amigo, Riangelo Stamper. E ultimo aki a declara cu prome cu nan a yega Aruba, Yohana a bula na awa. Pero nunca el a yega Aruba, te dia di awe. 

Yiu homber di Yohana, Kevin Gonzalez ta contradeci tur e informacionnan aki. Segun Gonzalez, e no tabata sa ken e personanan ta. Yohana a bisa su yiu cu e lo yega riba un diasabra. Semper e mama tabata bis’e cu e lo yega un fin di siman, mientras cu su yiu na Aruba ta pendiente di e yegada di su mama. Pero riba un diamars pa 2:00pm, e ta ricibi un yamada di e persona cu cual Yohana a pone di intermediario. El a haya e number di e persona cu mester a trece Yohana Aruba y ora cu el a yam’e, esaki a contest’e bisando cu e ta riba lama grandi. Asina nan a sigui tene na liña. 

Despues cu Gonzalez a pone presion, e ora Stamper a bis’e kico a sosode, manera cu el a sali den noticianan. Cu Yohana a bula na awa door cu Wardacosta tabata acerca.  Gonzalez a bisa cu e conoce su mama y cu e ta un persona, cu na e distancia cu nan a bis’e, e no ta un persona asina cu lo bula na awa asina no mas siendo cu e no sa landa. E ora e personanan encarga pa trece Yohana Aruba a bisa Gonzalez cu mester bati alarma.

Ainda na e momentonan ey den su pensamento Gonzalez tabata sigur cu su mama tabata scondi un caminda. El a sali bay busc’e pero sin resultado. Tabata den careda di 1:00am cu e ta den contacto cu Stamper y Laveist pa awo si bati alarma. Pero nan ta bis’e cu ta pa miho warda te mainta. Berdad, cu mainta ta bati alarma y Yohana su yiu, Kevin Gonzalez, tambe ta subi boto. Hunto cu Riangelo nan ta bay na mas o menos e luga caminda cu Yohana lo a baha for di e boto. Pero semper Riangelo a sigura Gonzalez cu Yohana si a drenta Aruba, na cual Gonzalez ta bisa cu si su mama a yega Aruba, e lo a drenta den contacto caba cu Kevin. Nan a describi na Gonzalez con Yohana tabata bisti y cu e tabata tin un saco cu algun remedi den dje cu ne. 

Algun dia atras el a ricibi un yamada di Segundo, cu ta e persona cu a entrega Yohana na Stamper, pa mand’e potret di e lancha cu cual nan a bin busc’e, ya cu e autoridadnan na Venezuela ta haciendo un investigacion di e caso aki. Pero Stamper a bisa Gonzalez cu nan a busc’e den un lancha blanco, e persona di contacto na Venezuela a sigur’e cu tabata c’un lancha preto cu nan a bin busc’e. Tabata tin hopi contradiccion den henter e declaracion di Riangelo Stamper. Mientras cu Stamper ta sigura cu nan a yega 6:00am, e contacto, Segundo na Venezuela ta sigura cu nan a yega pa 7:30am. Pero Stamper a bisa cu esaki no ta berdad, cu ta net lo contrario. Den henter e situacion aki, Gonzalez no sa ken ta papia berdad. 

Den declaracion haci na nos noticiero, Enfoke, Robert Laveist a sigura cu nan a ricibi menasa for di e famia di Leidy Yohana Salazar Lorza, cual yiu di Yohana ta refuta totalmente. E ta sigura cu nunca nan a menasa ni Stamper ni Laveist. Cu nan lo a busca hende for di Colombia, pa bin comete asesinato. 

Tambe e ta refuta e rumor di cu Yohana tabata tin mas di un pareha aki na Aruba. Loke si ta berdad ta cu Yohana tabata conoce hopi hende aki na Aruba y cu ta haya un lastima loke a sosode. A deporta Yohana y el a dura un aña deporta. Na Venezuela e tabata tin su pareha. 

Pa locual ta e placa cu Yohana a paga cu ta 2500 dollar, Gonzalez a bisa bon cla cu e no ta interesa den e placa, pero e kier su mama, cu ta loke ta e persona mas importante p’e. Si Gonzales a reitera cu e tin tur e combersacionnan warda y tambe e voicenotenan cu el a intercambia cu Stamper y Laveist. 

Por ultimo, Gonzales a bisa cu si ta berdad loke Stamper a bisa cu nan a bah’e na mas o menos 300 meter, e curpa su mama lo a aparece caba. Um biaha mas Gonzalez ta bisa, ken ta papia berdad, e no sa. No tabatin niun menasa den direccion di Riangelo Stamper. 

Loke Gonzalez kier n’e momentonan aki ta pa e curpa di su mama aparece. Nan sa cu e manera cu Yohana a bin Aruba, tabata tin su riesgo. Pero ya caba a pasa mas di un luna y nada cu e curpa di su mama ta aparece. E kier sa kico a pasa di berdad cu su mama! 

Si nan tin sospecho cu Riangelo Stamper ta sconde algo. Pero kico e ta, e no por bisa. 

Tabata te na ultimo cu e ex-pareha di Yohana a dicidi di bay entrega un denuncia di e desaparicion di Yohana, pero grandi tabata nan sorpresa ora cu a bisa nan cu no tabata tin niun denuncia entrega, mientras cu Gonzalez mes a bisa di tabata riba lancha cu Laveist y Stamper ora cu nan a sali bay busca Yohana cu el a wak e boto di Wardacosta y tambe helicopter bula. E ora e pregunta ta keda, con por ta posibel cu si no tabatin denuncia cu tabatin un buskeda pa Yohana? Hopi pregunta sin contesta.