Wyatt Ras (AVP): Ta imperativo pa parlamento haya su funcion bek di controla gobierno

Na clausura di e aña parlamentario ta custumber di duna un relato di e trabounan den Parlamento. Parlamentario drs. Mervin Wyatt-Ras ta haya cu durante e aña parlamentario cu a pasa 2021-2022 a lanta diferente comision fiho door di split comisionnan for di otro sin e resultado apropia. Por nota cu e comisionnan no a reuni mucho. P.e. gezin en ouderenzorg cu tabata forma parti hunto cu commissie volksgezondheid a reuni solamente 2 biaha. Esaki mientras nos famianan no por mas y no tin pan pa pone riba mesa. Comision di turismo cu ta asina importante pa nos economia a reuni solamente un biaha. Comision di ciencia, inovacion y energia no a ni reuni. Comision labor tampoco no a reuni, mientras nos pueblo ta sin trabou mientras e comision di relacionnan cu Noord America tampoco no a reuni. 

Ni papia di e comisionnan di independisacion di Parlamento cu a paga hende pa skirbi rapport no a reuni, ni e comisionnan particular di cambio di nos constitucion, ombudsman y monitoring di SDG’s. 

Pa loke ta trata optimalisacion di funcionamento di Staten tampoco no a reuni ningun biaha. 

Ta lamentabel cu e constelacion MEP-RAIZ tampoco no ta habri ni transparente pa laga nan coleganan di oposicion tambe ta (vice)presidente di e comisionnan. E ora sigur cu si lo traha mas efectivo. Zogenaamd nan lo por haci miho. E resultado pues di e comisionnan ta un diep onvoldoende. 

Banda di esey reunionnan publico cu oposicion a pidi tampoco ta otorga manera pidi. Solamente ora ta cumbini gobierno nan ta bin Parlamento pa insulta y critica gobernacionnan anterior sin ofrece perspectiva concreto pa futuro. Tin biaha ta yama bijeenkomsten, cu eigenlijk mester tin caracter informativo, sinembargo e presidente ta haci nan un verkapte reunion publico p’e ministernan por insulta e parlamentarionan di oposicion cu limitacion di e parlamentarionan di oposicion pa reacciona of presenta mocion of cierto cambio. E ministernan tampoco no ta contesta e preguntanan di parlamentario por escrito. Tanto hende cu ta cana rond den Cocolishi no por yuda e ministernan contesta e preguntanan di e Parlamentarionan cu ta encera preocupacion di nos pueblo. 

Aki por mira claramento un deficit democratico. Un otro ehempel ta mocionnan cu ta presenta door di oposicion. Di esakinan practicamente tur ta desaproba (mas cu 50%). Di 84 mocion entrega un cantidad di 49 so a aproba. Kiermeen mita di e mocionnan presenta so a aproba. 

Por conclui pues cu e presidente di parlamento aunke e ta gaba su mes continuamente y kier vigila tur parlamentario, no ta draai e parlamento manera mester ta. E por haci hopi mas pa obliga gobierno responde na Parlamento y haci e trabou di control di Parlamento mas efectivo. 

Banda di esey den cada reunion ora cu un miembro di Parlamento critica gobierno e presidente mes ta contesta e parlamentario mesora pa defende gobierno. E presidente tin hopi mas di siña di staatsrecht y di kico ta su rol como presidente. Ultimo el a saca un señora indefenso fo’i tribuna djies pa un par di comentario dirigi na e prome minister. 

Parlamento ta e organo di mas halto di pais Aruba pero e falta di maneho di e presidente ta haci cu ta gobierno ta controla Parlamento enbes cu parlamento ta controla gobierno. 

Wyatt-Ras a bin cu prueba concreto pa mustra riba e malfuncionamento. Sigur lo mester bin cambio. Ta imperativo segun Wyatt-Ras pa Parlamento haya su funcion bek di controla gobierno.