Work with us: Jobfair di Amsterdam Manor y MVC Eagle Beach lo ta diadomingo awo

Diadomingo proximo Amsterdam Manor y MVC Eagle Beach lo tene nan ‘jobfair’ cu nan a titula ‘Work with us’. E ‘job fair’ lo cuminsa for di 10:00am te cu 2:00pm

Den pasado caba, nan a yega di organisa esaki cu a resulta hopi exitoso, pa cual nan a dicidi di haci esaki un biaha mas. Joanne Dirksz, Sales and Marketing Manager na Amsterdam Beach Manor y MVC Eagle Beach, a bisa. E ‘jobfair’ lo ta na MVC Eagle Beach, situa net entre La Quinta Beach Resort y Chalet Suisse, dus hopi cerca di Eagle Beach.

Esaki ta un excelente oportunidad pa asina e persona cu bin e jobfair por haci un entrevista di biaha. Henter e proceso lo tuma luga eynan mes. Den pasado esaki a bay miho di loke nan a spera y e ta un oportunidad pa un y tur pa bin diadomingo pa asina posiblemente bira miembro di e famia di Amsterdam Manor Beach Resort.

Gina Maduro, Interim/HR Manager Amsterdam Manor Beach Resort y MVC Eagle Beach a extende un invitacion pa atende atende e jobfair. Tin varios posicion habri, manera den housekeeping, accounting, tambe den e departamento di Food & Beverage ta buscando varios persona entre otro hostess, bartender, waiter. Tur esun cu ta interesa di traha den e area aki di hotel ta bonbini pa uni nan mes n’e famia di Amsterdam Manor Beach Resort.

Mas aleu, Maduro a bisa cu eynan mes n’e sitio ta yena un formulario di aplicacion y riba e mesun dia ta haci un proceso di screening. “Si tur cos bay bon y tur papel ta na ordo, bo por cuminsa traha di biaha.”

REKISITO
Ta importante pa bin c’un CV, un ID valido y e personanan cu kier traha den e F&B, como tambe ta importante pa bin tambe cu e Greencard y Healthcard. E jobfair ta specialmente pa e personanan tin 18 aña of mas, pero Amsterdam Manor Beach Resort y MVC Eagle Beach ta un compania cu ta kere den nos hobennan, cu tin gana di sali bay padilanti. P’esey , den caso cu tin un hoben cu ta bisa cu e kier traha, pero ainda e ta bayendo scol, cu ta part-time so e por traha, nan tambe ta bonbini.