Werkster a haya rason den e caso sumario contra directiva di SKOA

Por bisa cu werksternan a haya rason den e caso sumario cu nan a cuminsa contra directiva di Stichting Katholiek Onderwijs Aruba (SKOA). E fundacion cu ta maneha scolnan Catolico, a corta rond di 31% den salario mensual di nan werksternan y esaki Corte a bisa cu no por. E ta kere cu reduccion di 5%, mescos cu e ambtenaarnan ta na su luga!

Diaranson tabatin e sentencia di e werksternan di SKOA cu den luna di juli a haya nan mes confronta cu un reduccion formal di nan entrada y, entre otro, cu no ta haya e primanan cu nan tabata disfruta di dje den pasado pa cual a dicidi di bay Corte. SKOA di su banda a bisa cu nan tin problema pasobra Gobierno a dicidi cu werksternan mester cay bou gasto di explotacion y no di salario. Pero SKOA a señala cu e gastonan di explotacion no a aumenta pa por cubri e salarionan aki. Tur cos a keda mescos.

Na april Gobierno a dicidi cu SKOA por haya un subsidio di 2.5 miyon florin pa cubri e entrada di werksternan pero e ta conta pa: salario minimo; vakantie-uitkering; kerstbonus y pensioen. E otro primanan cu nan tabata haya, a cay afo. Gobierno a dicidi cu no ta cubri e schaal segun ambtenaarnan; ATV-dagen; uitkeringnan AZV-Plus y Pensioen APFA y periodieknan. Despues di a paga nan loke debe nan, SKOA a baha e salarionan for di Afl. 2.195,– pa Afl. 1.815,35.

SKOA a bisa cu nan situacion financiero a empeora. Nan a haya Afl. 5.722.173,89 menos na subsidio. Y un di e consecuencianan tabata cu SKOA a acumula un debe na belasting di Afl. 3.667.005,90 te 18 februari 2022 y pa augustus el a bira Afl. 5.348.008,28. Si nan sigui paga e werksternan manera tabata antes y cu e subsidio di 2.5 miyon, nan lo keda cu un deficit anual di 540 mil florin. SKOA a haci e werksternan un proposicion pa baha nan salario, ta duna un bonus di pasco di 200 florin y nan ta cay bou di e seguro medico general cu tin.