Wendrick Cicilia (AVP): Un vision cu sosten di gremio ta e unico posibilidad

Diamars siman pasa CAft a dirigi un carta na Minister di Finansa y Cultura, relaciona cu su reaccion riba e di dos “uitvoeringsrapportage 2022”, cual contenido ta mustra e seriedad di e situacion cu pais Aruba ta confrontando na e momentonan aki pa loke ta su recuperacion financiero.

Wendrick Cicilia di partido AVP ta mustra cu na momentonan asina, caminda e situacion financiero di gobierno ainda no tin solucion, ta momento serio pa reflexion y na mes momento busca sosten amplio den comunidad pa yega na un vision pa un solucion serio y efectivo.

“Nos di AVP pa algun tempo caba a bin a reuniendo no solamente cu e ciudadanonan pa haya un miho impresion di loke nan ta pasando aden pero tambe cu gremio, pa di e forma aki yega na un solucion pa loke ta pasando, cu lo ta un solucion cu tin un base amplio di sosten.

E momento a yega pa presenta un vision of plan di accion cu lo ta cuadra cu henter e proceso den cual ta envolvi CAft y RMR pa loke ta ehecucion di palabracion haci cu e actual gobierno.

Sin duda pa yega na un solucion adecuado pa enfrenta e desaroyonan negativo cu a surgi for di e maneho di e actual gobierno, ta rekeri envolvimento di tur gremio, di tur instancia pa di e forma aki presenta un bon plan na gobierno Hulandes pa asina bay rumbo di solucion, rumbo di bon cooperacion.

Un plan cu ta conta cu sosten nacional y cu mester converti su mes den e punto di salida pa deliberacion nobo cu gobierno Hulandes, pa asina yega na un entendimento adecuado, sin cu  ta biba cerca CAft y RMR, e mesun ambiente crea pa e actual gobierno di Aruba, cu no a respeta palabracionnan haci”, Wendrick Cicilia a menciona.

Segun e hoben candidato di partido AVP,  e momento a yega pa atende cu tur loke Gabinete Wever-Croes no a respeta den palabracionnan haci, tuma un iniciativa nobo creando como punto di salida, dialogo serio y efectivo,  pa mira kico ainda lo por haci pa evita e desaroyonan negativo cu tin riba mesa na e momentonan aki, manera entre otro e posibilidad di un posibel “aanwijzing”.

“Fuera di haya un solucion cu sosten di un base amplio cu por a logra a base di dialogo extenso, tin otro asunto di vital importancia cu ta rekeri atencion urgente manera entre otro pa loke ta e sector laboral pero tambe e sector economico. E recuperacion economico na e momentonan aki, ta carga pa gran parti pa e desaroyonan impresionante den e sector turistico pero tin cantidad di otro aspectonan economico, cu ainda no ta atendi cu e urgencia cu esaki ta rekeri.

Den e sector laboral tin cu atende diferente situacion cu a presenta, no solamente door di e pandemia pero tambe door di e forma con gobierno a atende cu interes di e trahadonan cu a perde nan trabou. Nos tin hopi trabou pa haci y partido AVP ta reuniendo cu gremionan pa yega na un vision comun cu solucion pa e situacion cu tin na e momentonan aki”, Wendrick Cicilia di AVP a declara.