News

Wega politico den Parlamento por haci Aruba ingobernabel

.tdi_9.td-a-rec{text-align:center}.tdi_9.td-a-rec:not(.td-a-rec-no-translate){transform:translateZ(0)}.tdi_9 .td-element-style{z-index:-1}.tdi_9.td-a-rec-img{text-align:left}.tdi_9.td-a-rec-img
img{margin:0
auto 0 0}@media (max-width:767px){.tdi_9.td-a-rec-img{text-align:center}}

Tin un chens cu no solamente Glenbert Croes y Endy Croes ta keda sin trabou, pero Evelyn Wever-Croes y Ursell Arends tambe ta core risico di haya nan carta di retiro den e siguiente dianan. Tin dos reunion publico na caminda, den cual tin intencion di presenta un mocion di desconfiansa contra e dos mandatarionan. Esaki ta precisamente locual Gobernador lo a pidi ambos lider politico pa no haci. Gobernador kier evita cu Aruba ta bira ingobernabel. 

.tdi_8.td-a-rec{text-align:center}.tdi_8.td-a-rec:not(.td-a-rec-no-translate){transform:translateZ(0)}.tdi_8 .td-element-style{z-index:-1}.tdi_8.td-a-rec-img{text-align:left}.tdi_8.td-a-rec-img
img{margin:0
auto 0 0}@media (max-width:767px){.tdi_8.td-a-rec-img{text-align:center}}

Parlamentarionan Gerlien Croes, Rycond Santos y Miguel Mansur a pidi un reunion publico cu Minister di Integridad, Ursell Arends. Topico di e reunion tin di haber cu e caso Portulaca, di cual Glenbert Croes ta sospechoso. E mesun Presidente di Parlamento a organisa e reunion pa dia 31 di october 2024. Den gangnan di Parlamento ta menciona e opcion pa presenta un mocion di desconfiansa y asina manda e minister di Raiz cas! 

Ironia ta cu Ursell Arends a bay contra tradicion politico di Aruba pa permiti Geoffrey Wever di Partido FUTURO keda sinta den e stoel di minister di Pattido RAIZ y awo e mesun FUTURO ta pidi cabes di Ursell Arends den Parlamento. 

Pero esey no ta tur. Un siman despues ta bin un otro reunion publico, dia 5 di november 2024, unda a pidi pa Prome Minister mr. Evelyn Wever ta invita pa presenta. Dia 25 di juli 2024, Parlamentario Miguel Mansur y Marisol Tromp a pidi e reunion cu e topico metemento di politica den Ministerio Publico. Ta anticipa cu ey tambe lo tin intencion pa presenta un mocion di desconfiansa y saca e minister for di funcion. 

Aunke cu e opcion di presenta un mocion di desconfiansa pa baha un minister ta vigente, toch e por crea un situacion peligroso pa continuacion di gobernacion. Nos ta un luna leu for di eleccion, pues bahando cuater di e ocho ministernan den coalicion lo por dificulta gobernacion. Mas bien e ta parce un wega politico pero cu ta destabilisa gobernacion di nos pais. 

Tocante Gabinete Wever-Croes II

Eleccion yama adelanta dia 25 di juni 2021 a produci un resultado di cual e panorama politico a bira MEP cu 9 asiento, AVP cu 7 asiento, Raiz cu 2 asiento, MAS cu 2 asiento y Accion21 cu 1 asiento, pa hunto forma e 21 asientonan den nos Parlamento. Dia 20 di september 2021 e ocho ministernan di e Gabinete Wever-Croes II a huramenta of haci promesa dilanti di Gobernador Interino di Aruba, Yvonne Laclé-Dirksz. E gabinete Arubiano nobo ta un coalicion di MEP y RAIZ y ta conta cu ocho minister: seis di MEP y dos di RAIZ. Gabinete Wever-Croes II ta forma pa Evelyna C. Wever-Croes (MEP) como Minister di Asunto General, Innovacion, Organisacion gubernamental, Infrastructura y Planificacion Teritorial. Alabes e ta minister-president. Geoffrey B. Wever (Raiz) a bira Minister di Asunto Economico, Comunicacion y Desaroyo Sostenibel. Ursell M. Arends (Raiz) a haya e cartera di Minister di Integridad, Naturalesa, Transporte y Cuido di Grandinan. Alabes e ta e vice Prome Minister. Xiomara Maduro (MEP) a huramenta como Minister di Finansa y Cultura. Rocco Tjon (MEP) a bira Minister di Husticia y Asuntonan Social. Glenbert Croes (MEP) a huramenta como Minister di Labor, Integracion y Energia. Danguillaume Oduber (MEP) a bira Minister di Salud Publico y Turismo. Endy Croes (MEP) a haya e titulo di Minister di Enseñansa y Deporte. Na un prome instante a mantene Guillfred Besaril den e funcion di Minister Plenipotenciario di Aruba na Hulanda, pero na caminda el a tuma su retiro y a nombra Juan “Ady” Thijsen na su luga. Debi na un investigacion interno, a kita Besaril for di trabou y a keh’e penalmente. Dia 9 di september, despues di un problema interno entre MEP y RAIZ, a manda gobierno cas. Dia 8 di october a detene Glenbert Croes y a hacie sospechoso den e caso Portulaca, pa cual el a pidi retiro mesora. Dia 15 di october un mayoria den Parlamento a vota na fabor di un mocion di desconfiansa contra Minister Endy Croes, pa cual Gobernador a dun’e su retiro. 

Tocante Evelyn Wever-Croes

Evelyna Christina “Evelyn” Wever-Croes, un hurista y fiscalista, naci dia 5 di december 1966, riba dia 17 di november 2017 a asumi e puesto di Minister Presidente di nos pais. El a bira e prome hende muhe pa encabesa gobernacion di pais Aruba, despues di Henny Eman, Nel Oduber y Mike Eman.

El a participa den eleccion pa prome bes pa Partido Movimiento Electoral di Pueblo (MEP) na aña 2009 riba number 3 di e lista y a logra 1621 voto. Na aña 2011 el a asumi liderazgo di e partido cu su mesun omo a funda na 1971 y a bira e prome lider femenino di e partido, despues di defunto Betico Croes y Nel Oduber.

Como lider den eleccion na aña 2013 el a logra 3396 voto individual, mientras den e ultimo eleccion na September 2017, aunke e partido a bay dilanti cu 2 asiento, toch e votonan individual no a aumenta tanto, pero tabata bon pa 3503 voto riba nomber di Evelyn Wever, cu ta representa un aumento di 3.15%. Den e ultimo eleccion, Evelyn Wever-Croes a kibra su mesun record di voto, ora el a redobla su votonan personal y a yega 7518 voto riba su nomber!

mr. Evelyn Wever-Croes a studia ley na Universidad di Antias na aña 1985. Despues el a sigui pa Leiden, Hulanda, unda el a studia ley fiscal (Belastingrecht) te cu aña 1989. El a traha como Inspector di Impuesto di Aruba entre 1989 y 2003, trahando bou Gobierno di AVP y MEP. Ora di nombra director nobo, a scoge un otro persona riba dje, cu consecuencia cu Wever-Croes a opta pa sigui su carera profesional como Abogado y alabes Fiscalista na e oficina di abogadonan Croes, Wever & Tchong desde aña 2003 pa 2010, ora cu el a dedica completamente na politica.

Evelyn Wever-Croes ta casa cu Kenneth Wever desde aña 1991 y ta mama di Claudine Wever, Christine Wever y Kevin Wever y ta wela di Trystan Wever.

Tocante Ursell Arends

Ursell M. Arends a nace na Santa Cruz. Na aña 2000 el a bay studia Business Administration & International Business Management na Merca y Canada. Desde aña 2007 e ta traha y a crece den su funcion y yega te na Operations Director na La Quinta Beach Resort. Entre aña 2016 y 2018 e tabata presidente di Aruba Timeshare Association (ATSA). El a funda Raiz na aña 2017 y den su prome salida a logra 1433 voto riba su nomber. Den eleccion na juni 2021, Ursell Arends tabatin 1939 voto personal, cu ta representa un aumento di 35%.

.tdi_10.td-a-rec{text-align:center}.tdi_10.td-a-rec:not(.td-a-rec-no-translate){transform:translateZ(0)}.tdi_10 .td-element-style{z-index:-1}.tdi_10.td-a-rec-img{text-align:left}.tdi_10.td-a-rec-img
img{margin:0
auto 0 0}@media (max-width:767px){.tdi_10.td-a-rec-img{text-align:center}}

Comment

Your email address will not be published. Required fields are marked *