WEB Aruba NV a yega n’un record di 150 megawatt

Den un publicacion haci riba nan pagina di Facebook, WEB Aruba NV a anuncia cu e produccion di energia a yega na un record nunca bisto di 150 megawatt (MW).

E publicacion ta sigui bisa cu nunca antes Aruba a haya un peak di produccion asina halto. E peak averahe di produccion di energia den e plantanan di WEB ta 135 MW. 

Na 2015 e peak tabata entre 140 y 145 MW. Ta prome biaha den historia di produccion di energia na Aruba cu e peak ta yega 150 MW. Esaki muy probablemente ta debi na aumento di temperatura di dialuna y consecuentemente na un aumento den demanda di energia. 

Esey ta segun e cifranan cu por mira riba e imagen adhunto.

Sigur dialuna tabata un dia sumamente calor, cu ta haci cu e demanda pa coriente ta mas halto cu normal, por ehempel den uzo di airco, mirando cu e ta ranca e coriente, haciendo cu e ta pidi pa mas.

Ta p’e motibo aki mes, manera cu e publicacion mes a indica, e demanda p’e dia tabata mas halto cu normal cu a haci cu e cantidad di megawatt gasta riba nos isla tabata mas halto cu normal.

CORSOU TAMBE A EXPERENCIA RECORD

For di nos isla ruman Corsou, a bin di compronde cu Aqualectra ta premira cu e demanda di coriente dialuna por surpasa 135 MW, cual t’e maximo cu Aqualectra por produci actualmente, ta loke e entidad aki a publica riba su cuenta di Facebook.

E post ta sigui bisa cu normalmente por spera entre 10:00 pm y 12:00 am e demanda maximo di dia. For di 8:00 pm a registra un demanda di 130MW. Esaki a nifica cu e demanda ta surpasa Aqualectra su capacidad disponibel pa suministra coriente durante e orarionan di demanda mas halto.

P’e motibo aki Aqualectra a pidi cooperacion di comunidad di Corsou pa, no obstante e calor cu ta experencia, pa limita uzo di coriente na loke ta necesario entre 10:00 pm y 12:00 am.

Den caso cu e demanda surpasa e capacidad disponibel, Aqualectra por hay’e ta aplica e programa di schakel pa suministra comunidad, ta loke e publicacion a indica.