WEB Aruba N.V. tin dos siman pa bin bek cu propuesta na sindicato

Na salida di e reunion yama door di Gobierno di Aruba pa sinta cu sindicatonan riba e tema di aumento di tarifa di awa y coriente, partidonan a sali cu palabracion cu ta reuni bek aki dos siman pa trece propuestanan mas concreto dilanti. E ponencia principal di parti di sindicatonan ta cu e tarifa nobo lo afecta grandemente e finanzas di e trahado pa cual ta propone pa bin cu ahuste den e structura di tarifa y un vangnet social pa esunnan di menos entrada.

Presente na e reunion tabata representante di e sindicatonan SEPPA, SIMAR y SPA compaña pa organisacion OPPA, mientras cu di parti di gobierno tabat’ey Minister di Energia, Glenbert Croes y gerencia di WEB Aruba N.V., Elmar y Utilities Aruba N.V. E encuentro a tuma luga na Dr. Edward Cheung Center for Innovation na Sasaki, cual antes tabata sede di TNO y ta bisiña cu e sede di Utilities Aruba N.V. na Sasaki.

E reunion a bin despues cu sindicatonan a manda un carta pa Prome Minister, mr. Evelyn Wever-Croes dialuna ultimo expresando nan rechaso na e anuncio di aumento di tarifa pa suministro di awa y coriente. E sindicatonan ta condena e manera abrupto con e decision y anuncia a tuma luga y sin consulta cu e gremio y tabata poniendo e fecha di 5 di augustus como limite pa ricibi un reaccion. Inmediatamente e mandatario, kende ta di vakantie na Hulanda, a contesta cu e ta pone e peticion den man di su colega, titular di Energia, Glenbert Croes.

Minister Glenbert Croes a duna cuenta na sindicato riba aumento di prijs di awa y coriente

Minister Glenbert Croes a duna cuenta na sindicato riba aumento di prijs di awa y coriente

Posted by 24ora on Tuesday, August 2, 2022

Despues di algun ora reuni diamars mainta, e partidonan a sali indicando cu cada un a trece nan ponencianan dilanti. Dirigente di e sindicatonan representando empleadonan publico, maestro y polis a expresa cu contento cu e rapides cu cual a atende nan peticion y a scucha e argumentonan di e companianan di utitlidad riba aspectonan manera inflacion y cu no tin mas reserva pa absorba e gastonan di produccion. 

Asina mes, ta kere cu Utilities mester instrui WEB Aruba N.V. y Elmar N.V. pa bin cu un vangnet social cu cual por garantisa e suministro di e servicionan esencial aki na esunnan cu siguramente lo wak nan capacidad di paga nan recibo afecta. E companianan a papia di cifranan di inflacion di 1.5% pa 2% cu, na opinion di e sindicatonan, ta demasiado conservativo y cu en realidad pa fin di 2022 ta spera un indice di inflacion mayor, afectando severamente e cartera di e trahado.

Di su banda, gobierno ta reconoce cu mester a sinta cu e gremio prome cu a tuma e decisionnan aki. Den mesun rosea, ta adverti cu ya shete luna a pasa desde cu no a hedge y e companianan di utilidad no por sigui absorba e aumento den gasto di produccion.  Awo e companianan di utilidad ta bay cu e propuestanan haci pa realisa cierto ehercicionan y asina wak kico ta e posibilidad di efectua cierto ahustenan den e structura di tarifa nobo. Minister Croes a duna di conoce cu e idea ta pa esunnan cu lomba mas smal paga menos, mientras cu esunnan cu lomba mas hancho, carga mas peso.

Discusion riba tarifa di awa y coriente a bin despues cu dia 30 di juni ultimo, un dia despues cu un tormenta tropical lo mester a pasa riba e isla, comunidad a keda den shock pa e anuncio repentino di parti di WEB Aruba N.V. cu ta aumenta e tarifa di suministro di awa per direct cu casi 50%. E mesun dia e compania a hala e decision aki aden y consecuentemente Parlamento a yama un reunion cu gerencia di e compania di awa. 

Di e tempo ey caba algun sindicato a reacciona bisando cu e manera con a trece e aumento significativo aki no ta esun mas apropia, ni tampoco e manera con a structura e tarifa entre e diferente grupo di consumo, cu den nan opinion, ta afecta esunnan mas vulnerabel den comunidad.