Wardacosta a confisca y destrui pisca daña abordo di boto K-Fishing

Awe mainta Wardacosta a ehecuta un control riba un boto local cu e nomber ‘K-FISHING’ cu  tabata biniendo rumbo pa Barcadera. For di investigacion a saca afo cu e boto a bay busca pisca pa cumpra cerca un otro boto den awanan teritorial di Venezuela.

Abordo di e boto tabatin jugnan yena cu pisca y tambe piscanan poni abou den e boto den solo. Durante control  personal di Wardacosta a ripara cu tabatin pisca abordo cu ta mustra daña. Mesora a pone  instancia concerni na altura. A constata cu tabatin pisca cu no ta permiti pa consumo. A base di esaki a duna ordo pa destrui e piscanan. Wardacosta ta informa cu e lo keda cu su controlnan riguroso riba botonan cu ta bay tuma mercancia pafo di awanan teritorial di Aruba.