VWI na Minister Glenbert Croes: Bin cu prueba cu VWI ta afilia na un partido politico

Dialuna Minister di Energia, Su Excelencia Glenbert Croes, a tene un conferencia di prensa, den cual el a insinua cu VWI ta afilia cu un of otro partido politico.

Directiva di VWI a tuma nota di e rueda di prensa aki, den cual Glenbert Croes ta insinua, of ta conota, cu VWI ta afilia cu partido(nan) politico, specialmente cu e partido di AVP. VWI kier ta bon cla den esaki: VWI no ta afilia na ningun partido politico, VWI nunca tabata afilia na ningun partido politico y VWI nunca lo ta afilia na ningun partido politico. VWI ta condena cu Glenbert Croes ta pone un conotacion politico riba e ponencianan di VWI.

E asociacion VWI a trece e preocupacionnan netamente den e indole di e violacion di e Corporate Governance entre Utilities Aruba NV y WEB Aruba NV den cual Utilities Aruba NV ta haci actonan cu ta fuera di e meta di su statutonan y di cual Utilities Aruba NV no tin vergunning pa haci actonan comercial manera den mira cu e Expression Of Interest pa cu e expansion di molina di biento na Rincon. Ta bisto cu Minister Glenbert Croes, un bes mas, ta recuri na politikeria barata pa motibo di falta di argumentonan concreto y valido.

VWI ta reta Glenbert Croes hunto cu Ton Rojer pa elimina e Non-Disclosure Agreement cu tin riba e rapport di Project Consult Global S.A. y hacie publico pa asina por elabora riba e contenido den detaye publicamente. Pa reacciona riba locual Glenbert Croes ta insinua,sin base, lo siguiente: VWI a bini den existencia na december 2018. Prome cu e fecha ey VWI-vereniging no tabata existi.

Pa locual ta lo demas cu Glenbert Croes a menciona den su rueda di prensa, VWI ta referi na e  comunicadonan di prensa y loke VIW a presenta den su rueda di prensa di dia 20 di september 2022 unda cu a trece tur e preocupacionnan/ponencianan acompaña pa echonan concreto.