VRPA ta sostene pa aplica room tax pa tur vacation rentals

Vacation Rentals Professionals of Aruba (VRPA) ta den combersacion cu diferente stakeholdernan pa haci inicio na un etapa di colaboracion pa yega hunto na e miho opcionnan pa profesionalisa e sector pa cumpli cu rekisitonan regulatorio.

Ultimamente varios gremio ta pone enfasis riba e deber di vacation rentals pa cumpli cu impuesto, ta hopi importante na remarca cu ora ta papia di mercado di vacation rentals profesional, significa cu tur e companianan aki ta cumpli cu nan impuesto. VRPA ta sostene pa aplica room tax pa tur vacation rentals. VRPA ta den combersacion cu Departamento di Impuesto, AHATA y A.T.A. pa propone miho practicanan den regulacion incluyendo, cobransa, acuerdonan cu AirBnB y VRBO.

Na Aruba tin alrededor di poco mas di 4200 vacation rentals, di cual mayoria ta propiedad di localnan. Ta conoci cu e industria di Vacation Rental ta genera 470 miyon dollar den economia di Aruba directo y indirectamente. 25% di turista ta scoge pa keda den un Vacation Rental na Aruba y mundialmente. E tendencia aki ta creciendo dia pa dia mas y Aruba como un destinacion turistico dinamico, no por perde e oportunidadnan economico y laboral cu Vacation Rentals ta ofrece. Si Aruba no cumpli cu tendencia y demanda di e bishitante, Aruba ta core peliger di perde un bentaha competitivo compara cu otro destinacionnan Caribense cu si ta sostene e industria di Vacation Rentals. Ta importante pa yega hunto na regulacionnan cu ta solido y cu ta beneficia Aruba y e industria di Vacation Rentals.

VRPA ta un asociacion cu a wordo funda na aña 2021 cu e meta pa defende e beneficionan di e industria di Vacation Rental na Aruba y boga pa regulacion na un manera profesional y husto. Na aña 2021 Aruba a alcansa un maximo historico durante di $470 miyon dollar total den actividad economico, generando alrededor di 5600 cupo di trabou y creando oportunidadnan empresarial pa companianan chikito di mantencion, trabou den hardin y limpiesa. Esaki tabata un recuperacion mas acelera di Aruba su stabilidad economico directo y indirecto, compara cu turismo en general. 

Despues di a sinta cu varios stakeholdernan, por a tuma nota cu dialogo ta keda un factor importante pa comprende perspectivanan y crea caminda di inclusividad na momento cu yega na mesa pa presenta regulacionnan.