Violensia relashonal na Kòrsou ta muchu hopi i mester aktivá.

 

Willemstad – 25 di nòvember ta dia international di violensia kontra hende muhé. E tema global skohí e aña aki pa di Nashonnan Uní ta mará na konmemorashon di dia internashonal pa eliminá violensia kontra hende muhé.

 

E énfasis ta pa aktivá!

 

Hende muhé ta e ser kreá pa duna bida. Sinenbargo agreshon kontra e mesun hende muhé por eskalá yega te na ku e ta pèrdè su bida. World Health Organisation a públika ku mundialmente 30% di hende muhé a haña nan mes enbolbí den violensia físiko i/òf seksual ku nan partner intimó òf no partner seksual.

Ebestigashon hasí na Kòrsou na 2015 ta indiká ku 37% di hende muhé a bira viktimá di violensia relashonal. Si para ketu na e echo ku ta kasi mitar di e poblashon femenino a bira viktimá, mester uni i aktivá pa stòp e violensia kontra hende muhé. Sifranan den kasonan di violensia relashonal ku a keda registrá pa polis ta sigui subi. Na aña 2020, temporada di Covid i ‘lock-down’, esaki a eskalá yega na 190 kaso registrá, kombiná ku denunsia. Sinembargo e sifranan ta mas, mirando ku hopi ta esnan ku no ta òf por dal e stap pa hasi denunsia.

 

Tin hopi motibu ku viktimanan ta skohe pa no denunsiá. Den mayoria kaso e viktimá ta dependé finansieramente di e agresor. Famianan ku tambe ta haña yudansa finansiero òf tin benefisio serka e agresor, ta rekomendá e viktimá pa kòrda ku ’t’e ta yuda nos!’ Loyalidat na e persona i/òf miedu ta tambe ta faktor ku ta kousa silensio, soportando maltrato tras di maltrato.

Hopi ta e situashonnan ku ta kuminsá inosente, yená ku amor i legria, ku un futuro prometedor pa forma un famia i aportá na nos komunidat.

Lamentablemente ku tempu i sirkunstansia, e panorama bunita ta kambia, bira algu ku ta marka e hende muhé pa henter su bida. E muhé ku lo mester duna bida, kuida i eduká, awor mester skonde tantu di dia i anochi pa e por keda na bida.

 

Un danki, di kurason na kada persona i organisashon ku ta protehá i kuida di e muhé ku a bira viktimá di violensia. E yunan; e yu muhé ku ta eksperensiá e violensia den relashon di su mayor, tambe ta ser konsiderá komo un viktimá.

E trouma di mira agreshon verbal, emoshonal i físiko lo marka su bida tambe ku tur e konsekuensianan.

Algun konsekuensia tantu pa e muhé adulto i mucha muhé ta: sangramentu i/ òf enbarso no deseá. Problema pa drumi òf keda ku pesadia, strès, dolónan króniko, depreshon, ansiedat, pa menshoná algun.Esakinan tin konsekuensia, manera entre otro, ku no por sigui/ òf kaba estudio, ta pèrdè trabou, neglishá kuido na su mes òf famia. Ta importante pa para ketu na e impakto profundo ku e akto tin riba tantu na e hende muhé, mucha muhé, e famia i nos komunidat.

 

Riba dia internashonal di violensia kontra hende muhé, ministerio Desaroyo Sosial, Labor i Bienestar ta urgi nos komunidat i spesial den e temporada di fin di aña ku nos ta drenta, pa sembra pas i komprenshon. Ban stima mas, komuniká mas i protegá mas. Ta nos tur su deber!

Komo gobièrnu, lo sigui atendé e problemátika, salí for di un liderasko fuerte i firme. Bin ku leinan i maneho pa implementá ku ta promové igualdat di género, sigui invertí den organisahonnan ku ta sali na e bienestar di nos hende muhé nan i sigui traha riba prevenshon di tur tipo di maltrado kontra nos hende muhé nan. Aktivá i stòp violensia kontra hende muhé i mucha muhé.