¡Vamo’ Arriba!: Arajet lo conecta Aruba cu Santo Domingo 

Siman cu a pasa tabata importante pa Aeropuerto Internacional Reina Beatrix, un bes mas e aeropuerto a yama bonbini na un aerolinea nobo. E aña ‘ki, te cu awo, ta un aña di exito pa nos aeropuerto. Arajet a yega Aruba cu un “boom”, cu tarifa economico cuminsando na 168 dollar round-trip incluyendo impuesto, e ticketnan ta disponibel riba nan website www.arajet.com.

Vladimir de Leon, vice-presidente di ‘ancillary revenue and new business development’ pa Arajet, a cuminsa bisando cu Arajet ta un aerolinea completamente nobo y di prijs economico cu a nace na Republica Dominicana. E aerolinea ta bula cu Boeing 737-MAX-8 completamente nobo. Arajet ta garantisa cu su avionnan lo yuda sostene medio ambiente. De Leon a continua bisando cu Arajet ta enfoca pa duna e servicio Dominicano cu tur conoce, asina tur pasahero por disfruta di un experiencia diferente. E conexion cu Aruba ta importante debi cu esaki lo yuda desaroya e area di turismo, comercio y uni Aruba cu Santo Domingo un poco mas. Pa Arajet ta un placer pa por tin e ruta aki disponibel y ta spera di por tin hopi exito den futuro. 

INTERES DEN ARUBA

“Aruba ta un destino hopi importante den Caribe”, tabata e palabranan di Vladimir de Leon. El a continua bisando cu Santo Domingo y Republica Dominicana tin hopi pa ofrece pa Aruba pues a tuma e oportunidad p’e ruta nobo aki. De Leon ta kere den e ruta aki mirando cu no solamente e ta un ruta directo sino cu e tarifa ta economico. 

TURISMO TA SIGUI CRECE

Pa Ronella Croes, CEO di Aruba Tourism Authority, e logro aki ta nifica cu ta sigui traha riba diversificacion. Si pensa bon, segun Croes, den Caribe hopi bes ta problematico pa conecta di un isla pa otro. Croes a remarca cu Santo Domingo ta un mercado importante den e region di Caribe. A.T.A. ta spera cu e ruta aki lo por trece mas estimulo pa mas biahe denter di Caribe mes pa Aruba. A.T.A. ta consciente cu e aerolinea Arajet tin mas plan, pues esaki no ta un adelanto pa Caribe so sino pa America Central pero tambe pa Sur America. 

CIFRA TA BAYENDO BON

Si wak bek den e cifranan di 2007, un averahe di mas o menos 1500 turista procedente di Republica Dominicana ta bishita Aruba pa aña. Croes a menciona cu esaki no ta un cantidad grandi pero sinembargo e ta un cantidad cu tin e potencial pa crece. E avion di Arajet ta uno hopi grandi p’e ruta pues sigur dos vuelo pa siman ta nifica un adelanto hopi grandi. “Nos ta realisa cu esaki no solamente ta un beneficio pa turista of turismo pero e ta un beneficio pa nos localnan tambe y e ta un biahe etnico cu sigur lo forma un parti integral di e esfuerso nobo aki”, Croes a termina bisando. 

UN LOGRO MAS PA AEROPUERTO

Den combersacion cu Barbara Brown, Chief Commercial Officier na aeropuerto, el a comenta cu Arajet ta un cliente nobo pa aeropuerto. Na comienso di e aña ‘ki, Arajet a acerca aeropuerto, y a informa nan cu nan tabatin plan pa cuminsa opera un ruta nobo pa Aruba. Brown ta menciona cu aeropuerto a ricibi Arajet cu man habri cu nan idea. Aeropuerto tin varios luna ta trahando riba e ruta nobo aki y e ultimo dos luna a traha di manera intensivo p’asina por keda cla cu tur rekisito necesario pa nan por opera na aeropuerto. Cu e adkisicion di Arajet, ta bira 3 aerolinea cu ta bula pa Santo Domingo. E cantidad di sienta ta sigui subi y esaki ta haci cu e lo bira un exito pa Aruba. 

TRABOU TA SIGUI

“E aña aki tabata un aña excepcionalmente bon pa nos”, Brown a bisa. Durante e aña aki aeropuerto a haya hopi ruta nobo. Otro aña lo tin otro avion cu lo cuminsa opera ruta nobo, pero ainda e logronan p’e aña aki no a caba ainda mirando cu tin algun partner lo opera cierto frecuencia adicional for di gateways cu tin caba. Por spera diferente anuncio durante luna di october y december. 

Brown a finalisa bisando cu aeropuerto ta purba aumenta e rutanan fuera di U.S Gateways pasobra kier diversifica p’asina no depende riba e mercado Mericano. Locual cu nan a haci te cu awo ta dunando su resultadonan positivo. 

TURISMO TA IMPORTANTE

Minister di Turismo, Dangui Oduber, a menciona cu Arajet a haci un bon inversion den su avionnan y a scoge Aruba como un di su bintitres destinacionnan cu nan ta bulando. P’e minister, esaki ta demostra e confiansa cu e aerolineanan en general tin den Aruba. Si mira e resultadonan p’e prome ocho luna di 2022 den comparacion cu 2019, Aruba a surpasa e nivel di 2019. E resultadonan aki ta duna tur envolvi un sentido di satisfaccion.

TOCANTE ARAJET

Arajet ta e prome aerolinea cu tarifa economico den region di Caribe, e ta ofrece un servicio di clase mundial cu vuelo eficiente y conveniente cu ta conecta America y Caribe punta pa punta cu vuelo nonstop. E aerolinea comercial ta di origen Dominicano, e ta conta cu vuelo Dominicano mixto cu inversion stranhero. Cu base na Santo Domingo y avion Boeing 737-8 di ultimo generacion, completamente nobo y amistoso pa cu medio ambiente, Arajet ta spera di por conecta e destinonan principal di America, como cu e destinonan principal ta Colombia, Peru, Mexico, Costa Rica, El Salvador, Guatemala, Aruba, Sint Maarten y Corsou. Den futuro y segun ta agrega mas avion n’e flota, Arajet lo agrega mas ruta desde Merca te Brasil.

TOCANTE AUA AIRPORT

AUA Airport ta un di e aeropuertonan mas ocupa den region Caribe cu mas di 22 diferente aerolinea operando pa Aruba contribuyendo na mas cu 2.5 miyon pasahero pa aña (prome cu COVID) y cu vuelonan pa 28 diferente destinacion rond di mundo. AUA Airport ta opera stabiel cu mas di 95% di su bishitantenan cu ta bin pa vakantie di cual 79% ta for di Merca y Canada, 9% for di Latino Americano, 8% for di Europa y 4% for di Antia Hulandes te cu augustus 2022. AUA Airport ta reconoce cu esaki ta danki na e economia stabiel, clima politico, hospitalidad, populacion diversifica y siguridad general di nos isla. AUA Airport ta sigui expande y mehora su facilidadnan pa mantene su posicion como un di e aeropuertonan mas innovado den region.

Conoce mas di loke ta pasando na AUA Airport door di bishita www.airportaruba.com y conecta cu AUA airport riba Twitter.com/Aruba_Airport, Facebook.com/ArubaAirport, Instagram.com/arubaairport/ y  Linkedin.com/ArubaAirport.