‘Unox Nieuwjaarsduik’ na MoomBa Beach: E miho manera pa habri 2023

E orario ta 12:00pm, riba prome di januari, na MooMba Beach. Bo ta puntra bo mes, ta kico ta bay sosode eynan? Awel, hopi hende contento cu lo dal un duik den lama pa asina yama e aña 2023 un bon bini. Cu pechi bisti y hopi biaha wayaba door di tanto bebe, e atleta jong, esun mas madura y te hasta esun di mas grandi lo core drenta lama rib’e señal. E fiesta ta cuminsa pa 10:00am cu DJ Diablo. Pa net 12:00pm ta ora pa e Unox Nieuwjaarsduik anual.

Cu awa frieu, curpa y djente cu ta tembla door di frieu: nada di esey lo no pasa ora cu bo uni bo mes n’e Unox Nieuwjaarsduik riba prome di januari. Na Aruba, e temperatura di e awa ta dushi, solo ta briya y habri aña c’un duik den lama bo no mester pens’e dos biaha. Dus pakico no uni bo mes na tur e hendenan cu dia prome lo duik den awa cristalino colo turkesa, join e miles y miles di persona cu lo haci esaki tambe tur rond mundo. Pero, bou di circunstancianan nada di gaba!

E MoomBa Unox Nieuwjaarsduik tin su beneficionan: no solamente bo lo kita e wayaba cu bo ta despues di un anochi di fiesta for di dia 31 te su manece, pero tambe bo lo haya un conchi di ‘Sopi di Erwten di Unox’ cu smoked sausage despues. E tradicional plato Hulandes aki lo keinta bo curpa despues di a baña den lama y lo drecha bo curpa di biaha pa asina bo por sigui fiesta. 

E ‘Nieuwjaarsduik’ ta forma parti di un serie rond mundo, pero esun di Aruba lo haci tur hende jaloers ora cu nan wak bo curpa, c’un bunita color bruin di solo na MoomBa Beach. Pa net 12:00pm, lo duna e señal pa e landadonan core drenta lama en busca di fama eterno. Ta parti pechi n’e participantenan, pero ta spera hopi mas hende cu aña pasa, asina ta, bin trempan prome cu nan caba y cu bo no por bisti un pechi pa asina cubri bo cabes cu ta sinti cu tin un mini orkesta ta tocando den dje. Participacion ta gratis y tur hende ta bon bini. Pa mas informacion tocante e ‘Nieuwjaarsduik’ aki por haya riba www.nieuwjaarsduikaruba.com.

Bin MooMba (situa entre Holiday Inn Resort y Marriott Surf Club) y bula den lama! Feliz Aña Nobo!