Un sala completamente yen: E miembronan di OPPA a haya contesta riba belastingplan 2023

Presidente di OPPA Ivo Valdes, respalda pa su miembronan, a haci un peticion via un carta, na e minister concerni cu e cartera di ‘Ouderenzaken’ pa asina haya un splicacion concreto riba e anuncio di minister presidente relaciona cu e aumento cu pensionado lo ricibi entrante prome di januari 2023 pero tambe mas informacion riba reduccion riba impuesto cu lo tuma luga.

Un presentacion/charla prepara riba dialuna mainta for di 10:00 am te cu 11:30 am na Cas di OPPA caminda Minister Ursell Arends como tambe mr. Luenne Gomez-Pieters Director di Departamento di Impuesto a acepta e invitacion y a bin duna e miembronan un splicacion di kico tur lo bay sosode cu nan belasting.

Segun Ivo Valdes Presidente di OPPA, e preocupacion no solamente ta riba e anuncio pero con esaki lo keda haci. Ta papia di un calculacion separa pero referente esaki no tin nada concreto pa asina trankilisa e miembronan riba e tema. Valdez a remarca tambe cu e pensionadonan ta e grupo mas vulnerabel confronta cu aumento/medida cu lo keda introduci. Nan ta biba riba un entrada fiho y mayoria no lo suficiente, pa sobrevivi tur aumento cu ta tumando luga ultimamente.

Minister Arends a duna di conoce cu esaki no tabata e prome, pero algun charla caba cu a tene cu e grupo aki. En conexion cu luna di adulto mayor a hiba diferente presentacion informativo na e miembronan di OPPA riba diferente topico. En berdad a ricibi despues di e ultimo presentacion, un carta di parti OPPA caminda ta indica cu ainda tin preocupacion entre miembro, gran parti ambtenaar, relaciona cu e Belastingplan 2023 y kico lo ta su impacto.

Preocupacion mas grandi ta con esaki lo bay afecta e adulto mayor. Debi na e incertidumbre aki, a acerca tambe e directora di departamento di impuesto pa hunto duna un presentacion n’e miembronan preocupa di OPPA.

Den un sala basta yen, a duna un splicacion amplio riba kico ta e intencion, e plan y e cambionan cu lo bay tuma luga relaciona cu e belastingplan di gobierno. A para riba e importancia di brinda informacion na e adultonan mayor, mirando cu dentro di poco e plan aki lo keda introduci den parlamento y ta bon pa comunidad ta informa riba esaki y ta spera cu e charla di awe a trece claridad/trankilidad riba locual cu ta bay tuma luga.

A bin dilanti si cu e pensionado ta mira cu nan ta esunnan mas vulnerabel den e aumentonan cu ta introduciendo pero minister Arends a sinti cu despues di e charla, hopi a haya un contesta y aclaracion, aunke sigur no por descarta cu nan, e comunidad general,  lo ta afecta mas como cu nos ta importa inflacion pero ta sinti una bes nan a haya e informacion, nan por cuminsa planifica tambe con nan lo atende cu nan situacion/gasto financiero, cu tabata e proposito di e charla aki.

Di otro banda a combersa tambe cu Ivo Valdes Presidente di OPPA, cu a remarca e interes grandi cu a bin di parti di e miembronan di OPPA, caminda e charla tabata uno hopi interactivo y cu hopi pregunta. Ta e oportunidad cu nan a haya pa kita cualkier incertidumbre of preocupacion cu nan tin relaciona cu e topico aki. E indicacion cu lo introduci un belastingplan y cu lo baha suma for di e pensionado a pone cu a lanta hopi pregunta y cu a spera di haya contesta riba nan.

E fin di aña aki un gran cantidad di pensionado a ricibi aanslag extra (aña 2018 te cu 2020) di cu nan tin cu bay paga, di suma halto y pa cual a cay duro riba e pensionado cu ya caba ta riba un entrada fiho caminda gran mayoria tin cu yega na un areglo di pago pa por cumpli cu esaki.

Valdes ta spera tambe cu departamento di impuesto por bira un luga habri caminda pensionado por acerca cu cualkier duda y cu por haya informacion como cu no ta tur hende a logra haci pregunta y ricibi contesta durante e charla, como cu e luga tabata yen y hopi a bandona prome cu a haya oportunidad.

Un sala yen yen y cu mester a te hasta cera porta na dado momento!

Presente tambe tabata mr. Luenne Gomez-Pieters Director di Departamento di Impuesto cu a haya un charla completamente yen cu diferente pregunta relaciona cu cambio den impuesto. Locual cu mas a resona entre e pensionadonan ta e preocupacion cu nan tin pa cu peso di impuesto.

A haya oportunidad di splica kico ta e plannan cu tin awo riba mesa na parlamento pa haci cambio n’e peso di impuesto, ta compensa locual cu ta trata aumento di BBO y segun Pieters e pensionadonan a compronde esaki, cu lo tin un compensacion den e tasanan di impuesto di inkomstenbelasting, tasa/suma liber di impuesto, reparatietoeslag cu lo subi pa nan como tambe nan pensioen. Locual cu tambe a bin dilanti durante e charla ta un punto cu ta haci dolor na e grupo di pensionado ta e topico di AZV. Volle pond ta keda paga, mientras nan no ta trahando, no ta paga werkgevers y werknemersdeel cu ta un peso grandi pa nan y sin lubida cu nan tin cu paga pa remedi como tambe otro gasto cu nan tin cu cubri cu ta subi door di inflacion mundial.

Un sala cu hopi pregunta, al caso y a aprecia cu ta un grupo cu ta interesa den cambio (nan) di impuesto, kico e ta nifica pa nan. Na mes momento tambe a bin dilanti e malcontento pa locual ta trata e contacto cu no ta haya cu e departamento, basta critica a bin dilanti referente esaki. Durante y despues di pandemia a bin diferente cambio pero esun cu mas ta keda resalta cu ainda no ta yega na contacto via telefon cu e departamento.

mr. Luenne Gomez-Pieters tambe a splica kico ta haciendo pa atende cu retraso, e digitalisacion cu ta di importancia pa asina facilita entrega di formulario di e contribuyente pero tambe busca un manera pa mehora e servicio aki na e pensionado como cu pa nan lo ta mas apreciabel papia cu un persona personalmente y asina haya contesta riba nan preguntanan.

Pa finalisa minister Ursell Arends a indica cu e charla tabata uno exitoso y ta spera di mira cu na momento cu nos pais drenta den recuperacion, cu e adulto mayor tambe por sinti parti di e beneficionan aki den nan cartera,

Valdes tambe a duna di conoce cu esaki lo no ta e ultimo charla den e contexto aki mirando tur e contribucion cu pensionadonan ta haci na caha di gobierno. Si pone den perspectiva locual cu cada pensionado ta paga y locual cu kier duna bek na reparatie, cu ta un suma di Awg. 45,=, na banda di tur e gasto cu nan ta confronta nan mes cu ne ( comestibel, coriente, awa, remedi, gas y mas) e reparatie ey lo ta manera tira salo den awa.

Un recomendacion ta pa mira bon con ta maneha cu nan placa/entrada y pa gobierno tene cuenta cu e pensionadonan pasobra nan no tin’e facil.