Un curason limpi y un spirito recto

Den e bida aki tur hende por trompica, nos tur por haci fout, pero tin un diferencia den haci fout y biba den maldad. Hende por cay den tentacion, pero tene cuenta pa no laga e enemigo tuma dominio y esclavisa bo den scuridad.( Lucas 22:40)

Kico cu un hende por a haci robes den su bida si e persona arepenti, confesa y aparta, Dios ta fiel y husto di pordona.(1 Juan 1:9).

Mayoria biaha e persona no por drecha locual cu e a daña, ni tampoco por paga e daño causa, por tin castigo di prison envolvi ,pero e simpel echo di reconoce dilanti di Dios, cu e tabata robes, Dios ta pordona y restaura su bida. 

Tene cuenta cu hende semper por keda papia, pero ora bo comberti di berdad, ya bo no ta biba pa bista di hende mas pero bo ta biba pa Dios.

P’esey tin hopi hende cu no por compronde, e misericordia di Dios con un adicto, ladron ,criminal, atracador, abusador, prostituta, un inmoral,un persona di mal reputacion por yega dilanti di Dios, ricibi pordon di Dios y cambia su bida completamente y bira un cuidadano respeta, esey ta solamente Dios por hacie pa nos.( Hechonan 19:11+12). Tambe nos tin di tene masha cuidao di sigui persigui un hende cu Dios a pordona.( Mateo 18:32-35).

Por ehempel den un caso di divorcio caminda adulterio a wordo cometi e pareha no por keda persigui otro pa bida largo, pasobra cualkier persona cu arepenti, Dios ta pordon’e y Dios lo yude pa e sali pa dilanti. ( Juan 8:9-11).

Pa nos por lanta riba di pica, nos mester ta sincero cu Dios y demostra di nos curason, cu nos kier bini bek riba pia, no pa mustra con bon nos ta, pero pa testifica e grandesa y bondad di Dios. P’esey nos mester pidi Dios crea den nos un curason limpi, puro y un spirito recto, nobo y fiel den nos, pa asina ora e enemigo pensa cu e por tira man riba nos bek, e ta  dal den duro, pasobra e ta hanja un curason yena cu Dios.

Con nos ta yega na un curason limpi y puro?

Na prome luga un curason limpi y puro ta un curason humilde y pa nos haya esey nos mester entrega nos bida completamente na Cristo Hesus y laga Hesus purifica nos curason:.

Pa medio di Su Palabra. Nos mester pasa tempo den Su presencia, den oracion y lesando Su Palabra. Mantene nos boca limpi, di palabra malo y redo. Cuida nos pensamentonan. Aparta mal influencia for di nos curason. Arepenti tur momento di nos picanan. Y keda habri pa coreccion y enseñansa.

Un curason puro por comunica cu Dios, un curason yena cu odio, malisia, arogancia, orguyo y falta di pordon no por comunica cu Dios. Rey David a comete adulterio, manda  mata hende y trata na sconde tur cos pasobra e tabata rey y a pensa cu nunca su berdad lo a sali na cla. Pero ora cu e a wordo descubri prome cos cu e haci ta arepenti y pidi Dios pa  crea un curason limpi den dje y dun’e un spirito recto, nobo y fiel. ( Salomo 51:10) Pasobra esun cu sconde su pica lo no prospera, y un bida asina no ta agrada Dios.  Hopi biaha hende ta haci fout pero nan no kier entrega, pero Dios den su misericordia ta pordona, y haci nos un persona nobo.( 2 Corintionan 5:17).

Sinceramente , Pastor Marcel Balootje.