Un consenshi corupto y kima

Un bida aleha for di Dios y hopi falta di oracion ta pone nos consenshi na peliger, ta pone nos pensa solamente riba nos mes, bira orguyoso y arogante, y lubida cu nos tin mester di otro.

Cada decision cu un hende mester tuma e no mester pensa riba awe so, pero tambe tuma un rato y pensa, kico lo pasa si e bala bay rond y bin cay bek cerca dje mes, pasobra hopi biaha decision ta wordo tuma pensando cu ami ta bon, ami ta cla, mi no ta worry, cada ken saca nan som.

Specialmente ora ta trata asunto di famia y matrimonio, nos mester pensa hopi bon, ora nos ta tuma decision, pasobra decision robes ta causando, hopi problema y dolor, y e consenshi su rol ta grandi.

Un hende cu bon consenshi ta tuma bon decision, un hende cu mal consenshi ta tuma mal decision.

Ora bo ta gaña hopi, diabel ta cumpra bo consenshi, y sin bo nota bo ta haya un consenshi corupto, cu ta balia manera un yoyo, complaciendo aki y aya cu hende y lubida riba e temor di Dios.

Den Daniel capitulo 6, Daniel a mustra rey Dario claramente cu e por ta su doño di trabao, pero ora ta trata di su consenshi y su fe den Dios, ta dificil pa e nenga Dios, y sirbi diabel.

Ora como mayor nos tin cu tuma decision pa bienestar di nos yiunan, nos mester tin un consenshi corecto cu no ta apoya maldad, pero cu ta para riba e palabra di Dios, y no aplica sistema di mundo den cas, pa asina pas y bondad por reina.

Un mayor cu ta serio, ta keda para firme den tur circunstancia, y no ta dobla pa ningun clase di manipulacion, pasobra su consenshi ta limpi, y e sa kico tin den futuro pa su yiunan.

Den 1 Timoteo 4:1 ta para skirbi: Ma e Spirito ta bisa claramente (Spirito Santo) cu den ultimo temponan algun lo cay for di Fe, door di paga atencion na spiritonan engañoso y doctrinanan di demoñonan.

Pa medio di hipocresia di gañadonan, kende nan mes consenshi a wordo kima, como si fuera esaki ta cu hero cayente a wordo haci.

Cuanto hende ta mira bondad, pero toch ta sigui haci maldad?

Cuanto hende ta tuma risico cu nan bida, door di alcohol, droga, arma, etc.?

Cuanto hende kier bay contra boluntad y principionan di Dios?

Cuanto hende no a perde respet pa nan mes bibando den inmoralidad?

Cuanto hende grandi, sabi cu bon educacion ta biba den scuridad y ta kere cu ta luz?

Cuanto hende nan consenshi no ta reacciona cu ta malo nan ta haci?

Cuanto hende no ta pone placa y paranda na prome luga en bes di busca cara di Dios?

Ora bo ta apoya algo, contra boluntad di Dios, y bo ta sostene inmoralidad, ta nifica cu bo fe a tambalia, bo no ta para firme riba e principionan di Dios.

Laga esun cu ta stima bida,y mira dianan bon, frena su lenga di loke ta maldad y su lipnan di papia engaño.

Lag’e aparta su mes di maldad y haci bon, lag’e busca pas y siguie.

Pasobra wowo di Señor ta riba e hustonan y Su horea nan ta atento pa scucha nan oracion.

Ma cara di Señor ta contra esunnan cu ta haci malo.

Nos consenshi por wordo limpia ora nos arepenti y aparta di maldad.

Esun cu confesa su pica Dios ta fiel y husto pa pordona (1 Juan 1:9).

E tempo ta dificil pero nos bista mester permanece riba Dios.