Tur hende ku entrada minimo, por registrá pa rekonektá awa.

 

Willemstad – Konsiderando e importansia di awa i e situashon aktual na Kòrsou kaminda tin un grupo grandi ku awa deskonektá, minister di asuntunan sosial a habri e posiblidat pa hendenan ku awa deskontá registrá ‘online’ pa por bin na remarke pa ayudo.

 

Di e manera aki e Ministerio di Desaroyo Sosial, Labor i Bienestar (SOAW) ta haña un bista mas kla kuantu kas di famia ku entrada minimo no tin akseso na awa. Durante un konferensia di prensa, Minister Larmonie-Cecilia a enfatisá tambe riba nos responsabilidat propio, esta ku nos mester bira mas konsiente kon ta usa awa responsabel, pa evitá situashonnan di debe di awa den futuro.

 

Kontrali na persepshon ku ta hendenan den ònderstant so ta risibí supsidio pa awa, tur hende te ku entrada minimo por registrá pa por bin na remarke pa rekonektá awa.

 

Entrante 29 di novèmber por scan e QR code ku tin riba pagina di Facebook di Ministerio di Desaroyo Sosial, Labor i Bienestar (SOAW) o bishitá http://awa.soaw.info pa yega e formulario pa bin na remarke.

Tambe por bishitá Kasnan di Bario di SOAW kaminda lo tin varios hóben ku ta duna asistensia pa yena e formulario ‘online’. Den e periodo ku ta sigui lo keda informá pueblo di posiblidatnan ku e ministerio ta brinda i tambe konsientisá pueblo riba importansia i uso responsabel di awa.