Tur dos deteni: Un pa agresion y e otro pa buracheria

Algo a bay completamente robes entre e pareha aki. A pidi patruya presenta na Flacciusstraat, Playa pa un pareha cu a dicidi di dal basta drinks dimas, caminda situacion a caba den agresion y detencion.

Den careda di 1:00 am a yega dicho adres y a topa cu un persona maltrata y e agresor na sitio. E victima, a pesar di a keda maltrata, e tambe a keda deteni debi cu e tabata bou influencia. A detene pa buracheria.

Di otro banda e homber a keda deteni pa agresion cometi riba su pareha. Lamentabel cu cada biaha mas hende ta bira victima di maltrato y ta opta pa no haci denuncia. Maske ta dificil, tin cu corda cu tin ayudo di diferente instancia eyfo y ta cla pa duna un mas na momento cu pidi esaki.

Si bo kier cambia, tin ayudo

E reto no ta cu bo tin problema di alcohol of droga, sino cu tin ayudo, Mescos cu bo, tin hopi otro ciudadano cu tabatin of tin e mesun problema cu bo y cu ta dispuesto pa comparti cu bo nan storia di exito, cu awe nan ta liber di alcohol of droga. Ta un grupo cu ta topa diariamente na diferente sitio, pa esun sostene e otro y hunto laga e bicio, cu ta caba cu bo famia, bo carera laboral y sin lubida bo salud.

Alcoholic Anonymous Aruba ta existi pa hopi aña caba y tin reunionnan diario, tanto na nan clubhuis na Sabana Liber na Noord of na Weg Seroe Preto na San Nicolas. Pa mas informacion di orario di reunion of pa por bel y papia cu un boluntario, subi e website: www.aa-aruba.org.

“Hende no ta cambia pasobra nan a mira e luz. Nan ta cambia pasobra nan a sinti e cayente”