Tur desobediencia tin su consecuencia

Cuanto hende no ta lamenta awe cu nan no a tende di nan mayornan, y e Tur Tur desobediencia tin su consecuencia tin su consecuencia ta cu cos no a bay bon cu nan, pasobra nan no a tende  di nan mayornan.

Tin di nan a sufri daño grandi, awe nan ta handicap, tin a perde nan trabao, tin a perde nan famia, tin ta sera den prison, tin no a caba ningun clase di scol, tin ta den adiccion, y tin no tey pa conta pasobra nan a perde nan bida.

Esaki ta un gran berdad, pero tin un diferencia ora hende ta papia y ora Dios ta papia, si bo mayornan bisa bo algo y bo ta sera bo orea y hunga sordo, rechasa completamente locual nan ta bisabo, ta yega un momento cu bo ta keda boso, paso bo no kier tende, y e ora ey Dios mes lo mustra ken tabatin rason.

No ta bay pa ken ta mas sabi, pero ken ta tende, pasobra hopi biaha yuinan ta kere cu nan ta mas sabi cu nan mayornan, y cu nan mayornan ta anticua, chapo, nan no ta den moda.

Cuanto hende nan dokter no a consehanan , pa baha peso, stop di huma, stop di bebe, baha man na suco, baha man na vet, pero tur cos tabata envano y ora nan ta riba cama di malesa nan ta lamenta.

Tur desobedencia na Dios tin su consecuencia, y poco, poco esey ta wordo demostra, pasobra tur locual hende sembra nan lo cosecha, pasobra ningun hende no ta haci bofon di Dios ( Galationan 6:7).

Biewnan ta bisa ora bo mira cas di bo bisiña ta na candela, bo mester tira awa riba esun di bo, pa asina evita cu e vlamnan alcansa bo hogar.

Diabel a bisa  Adam y Eva cu  si nan come di e fruta prohibi nan lo ta manera Dios (Genesis 3;1) y ta ora nan a come for di e fruta nan wowo a habri y nan a haña sa cu hopi dolor cu no ta asina, cu hende no por ta igual cu Dios.

Esaki ta un wega cu ta wordo hunga pa siglo y siglonan entre Dios, hende y diabel, caminda Dios a demostra tur locual ta bon pa nos, pero toch nos kier pretende di reta Dios y sigi e caminda di maldad.

Hende a bira asina malo riba mundo cu den Genesis 6 e palabra ta bisa cu a duel Dios cu e a traha hende, pasobra hende tabata haci maldad so y tur intencion di pensamento di su curason tabata continuamente maldad .

Maske cuanto Abraham a intersede pa Sodoma y Gommora  e pueblo nan no kier a tende, nan kier sigi den nan maldad, den nan inmoralidad y no kier a tende. Y na a wordo destrui cu candela.Dios a saca Lot y su famia for di Sodoma, pasobra Lot tabata husto.

Inmoralidad a causa bida di Samson, Inmoralidad a causa hopi daño na David y su Famia, pasobra tur dos a kere cu nan ta mas sabi cu Dios.

Den Mateo capitulo 13 palabra di Dios ta splica cu e Maishi y e yerba Shimaron lo crece hunto, pasobra ta Dios a sembra e maishi y diabel a sembra e yerba shimaron, y cu na final Dios lo cosecha e maishi y warde den mangasina y e yerba shimaron lo wordo kima.

Tur locual hende sembra nan lo cosecha si nan no arepenti na tempo di nan pica, y no lubida ora nos apoya maldad, nos lo wordo considera como piedra di trompica, mescos cu un mayor cu no ta disiplina su yiu.

Sinceramente, Pastor Marcel Balootje.