Tur descuida: Santana publico na Playa ta manera un yiu sin mama

No ta solamente den luna di November dia di tur difunto ta haya famia ta bishita nan sernan keri cu ta sosega den santana. Tin hende cu semanalmente of durante cierto temporada ta pasa bishita e santana unda nan famia ta dera. Bo tin Santana Catolico, Santana Protestant y tambe Santana di Gobierno den Caya Ernesto Petronia.

E Santana di Gobierno ta net pariba di Topcar na Playa. Pasco y di dos dia di Pasco famia a bay haci un bishita cerca nan ser keri. Casi nan no por a pasa pa yega na e graf. Un santana totalmente descuida y parce un mondi completo. Awo por tira culpa riba famia, pero e ta un responsabilidad di gobierno pa mantene e santana den un forma decente. Den pasado tabata tin un ploeg tabata mantene e santana di gobierno.

E santana ta parce un area cu masha dia no a mira cara di esnan responsabel pa mantencion. Kizas placa no ta yega y esey ta pone cu ta lubida of ta pone e santana un banda. Gobierno tin otro prioridad manera por constata. Ta haci un peticion na e departamento di gobierno encarga pa duna respet na famianan cu tin nan ser keri dera den santana. Of traha riba un comision manera otro santanan y asina mantene e area den un forma decente. Manera e ta no por.

Ta manera un yiu cu ta benta sin mama y tur descuida. Sikiera esaki gobierno por mantene y asina tene famianan contento cu nan placa di belasting. Den e mesun santana ta mira grafnan kibra y chollernan tambe ta hiba cosnan horta pa nan coba aden.