TUI TA E AEROLÍNEA OFISIAL DI FFK TE KU AÑA 2026!
Djamars 12 di sèptèmber último TUI i FFK a sera un kombenio kaminda TUI a bira e aerolínea ofisial pa nos selekshonnan nashonal ku lo representá nos isla den eksterior.
Ámbos partido a firma e akuerdo aki na FFK pa despues bai riba e tereno na Stadion Rignaal ‘Jean’ Francisca kaminda a inmortalisá e momentu aki, ku ta representá e komienso di un bunita relashon entre TUI i FFK. Awor, FFK ta konta ku un partner mas ku lo sòru pa tur nos selekshonnan yega nan destinashon sano i salvo, kontando ku un tremendo servisio durante e buelo ku TUI ta konosí pa brinda su pasaheronan.
“Ta ‘great’ di por bula ku TUI pa enkaminá nos biahe rumbo pa Mundial ku un aerolínea konfiabel i ku hopi eskperensia pa plania biahenan”; tabata palabranan di e presidente di FFK
Sr. Ramiro Griffith. FFK tin un soño ku nos ta trahando duru pa alkansá, esta klasifiká pa Mundial di FIFA 2026. “Nos komo TUI tambe ta kere den e soño aki i ta p’esei nos ta sumamente kontentu, orguyoso i agradesido di por forma parti di e proyekto aki i ku FFK ta kere den TUI” Sr. Rick van der Pluijm, Head of TUI Dutch Caribbean a alegá.
Pues kuminsando ku e biahe ku nos selekshon nashonal mester hasi pa Indonesia pa nos proksimo kompromisonan i tur otro biahe ku nos selekshonnan nashonal lo hasi te ku aña 2026, lo ta ku aerolínea TUI ku a bira un partner mas di FFK.
