Tropical Bottling Company a estrena cinco truck nobo

Despues di un aña di tempo, Tropical Bottling Company a estrena cinco truck nobo. Christina Yrausquin, gerente di benta di Yrausquin a conta cu e trucknan aki ta bin di un commercial line fo’i aña 2015. Un proyecto cu hopi detaye den dje, pasobra a solicita hopi detaye den e trucknan di marca Freightliner. Awor a yega e dia cu porfin a entrega nan.

“Freightliner Trucks” ta traha special pa Beverage Trucks. Cu nan Tropical Bottling Company lo entrega tur producto cu nan ta bende, entre otro Coca Cola, refresco di color, cerbes Balashi. Antes nan tabatin otro marca, pero awo lo cuminsa uza Freightliner, traha cu motor di Mercedes Benz. Ta trucknan hopi duradero y confiabel.

Christina Yrausquin a gaba cu nan ta hopi orguyoso. Na december nan lo celebra 70 aña di existencia, for di tempo cu nan defunto welo a cuminsa na Corsou. Awe, como e di tres generacion, nan ta hopi orguyoso cu Yrausquin por ofrece servicio na Tropical Bottling Company. “Welcome to the Family,” asina Christina Yrausquin a expresa na e bendedonan di Coca Cola, Tropical, Schweppes y Balashi.

NAN TA UN BEYESA

A invita Eddie de Veer, CEO di MetaCorp, pa admira e trucknan nobo cu Tropical Bottling Company a cumpra. El a splica cu nan a cumpra varios truck nobo pasobra nan tempo a yega. E trabao cu e trucknan ta haci ta demostra cu e compania a crece y mester di truck mas grandi y nobo. Pa sorpresa di hopi, e trucknan a yega y nan ta un beyesa, asina Eddie de Veer a remarca.

Pa MetaCorp, cumpramento di trucknan nobo ta traduci den un inversion cuantioso. De facto, pa e compania por sigui crece, conkista mas “market share”, ta necesario pa inverti. MetaCorp ta orguyoso di por confia den un compania netamente Arubiano, pa sostene nan den crea un flota di trucknan di calidad superior, brinda servicio regular, pa garantisa cu nan ta sigui traha bon durante hopi aña.

E tipo di companianan cu ta resorta bou MetaCorp, mayoria ta uza trucknan grandi pa e trabou cu ta eherce. Specialmente si pensa riba ATCO Aruba, APEX, EcoTech, EcoGas y Tropical Bottling Company. Ta rekeri un formula pa cuida e trucknan, service nan regularmente y haci servicio preventivo, pues pa no warda t’e ora e vehiculo daña pa drech’e. Di e forma ey ta garantisa un uzo largo y cu ora di reemplaz’e cu ainda e tin un balor halto.

UN ORGUYO

Eddie De Veer ta sigui comenta cu semper ta un orguyo ora mira e compania crece. E trahadonan, cu t’esunnan cu ta pusha e compania, ta esunan cu ta duna tanto di nan mes y consecuentemente ta laga e compania crece. E ta sigur cu e trahadonan ta wardando nan turno, pasobra tur kier core den truck nobo. Historicamente e chauffeurnan semper a cuida nan truck. Eddie de Veer ta sigur cu den nan man, no solamente nan lo sigui pone e compania crece, pero nan lo cuida e trucknan tambe.

ULTIMO PALABRA

Eddie de Veer a yama famia Yrausquin “masha danki” pa brinda atencion y un servicio excepcional na Tropical Bottling Company. Tambe na e compania Freightliner, pa por a sostene e peticion y cumpli cu esaki na tempo.