Tres morto riba su consenshi: Stephen Wilson ta liber manera un parha

Contrario na locual Cuerpo Policial Aruba a bisa y tambe Ministerio Publico a sigura na nos, ya e sospechoso di “dood door schuld” tin no un, ni dos, sino cuater dia liber caba, gosando di su bida. Polis ta wardando pa hospital haci nan trabou, siendo e sospechoso ta liber di siman pasa! No sa mes si e ta na Aruba ainda.

Stephen Wilson a causa un accidente diadomingo dia 2 di october ultimo, durante ora di mainta, na altura di entrada di Lago Colony. Den e accidente aki tabatin tres morto, dos ruman muhe y un mucha. E accidente tabata horibel, debi na exceso di velocidad. Na e sitio Stephen Wilson a test positivo pa alcohol, pues tabata burachi! Testigo ta hasta bisa cu e tabata pusta cu un colega, pa mira ken ta yega trabou prome.

Ministerio Publico, cu ta encabesa tur investigacion penal, a bisa cu ya caba na a interoga e sospechoso na hospital. Pero como cu e ta recuperando, a suspende e proceso di detencion. Nan a confia polis den e proceso aki, cu na su turno a bay pidi hospital “un fabor” pa informa nan ora cu dokter laga e pashent bay cas, pa nan core yega “por arte de magia” pa detena eyfo.

Awel, pa di mil biaha Cuerpo Policial Aruba lo mester compronde cu ningun dokter y pio nurse na cualkier hospital di mundo, lo bay kibra nan promesa di secreto medico, ni pa polis. Locual polis mester a haci, y semper ta haci normalmente, ta detene e pashent y keda cuid’e na su porta di camber te dia e por bay prizon. Den e caso aki a opta pa spaar riba overtime y awo ata e pashent a bay cas di diabierna caba y awe diamars ainda polis ta man crusa wardando dokter yama nan. Nan lo mester warda hopi prome cu nan haya e yamada ey pasobra dokter no mag kibra secreto medico.

Hospital mester ta un luga neutral na unda tur hende, criminal of no, ilegal of no, tin derecho riba cuido medico. No por ta asina cu un criminal of un ilegal ta haya miedo di bay hospital pasobra e nursenan eyden lo yama autoridad pa nan. E unico momento cu hospital ta informa husticia ta ora tin un victima menor di edad, cu no por para responsabel pa su mes. Den tur otro caso, secrecia medico tin preferencia riba tur “fabor” cu polis pidi.

Famia di e victimanan ta sinti nan mes masha desiluciona pa e forma con polis ta atendiendo cu e caso. Nan a dera tres famia diasabra, den hopi dolor y e sospechoso ta liber manera un parha di siman pasa. No pasobra cu polis a lag’e, pero pio ainda….pasobra cu polis no sa mes!

Foei polis….esaki ta un eror grave den procedimento penal, cu por a preveni. Fiscal tambe a bay hunga bankero pa purba spaar placa pa gobierno, pero a permiti pa un sospechoso di stuur auto burachi mata tres hende, awe ta cana liber eyfo, gosa di su fin di siman y polisnan man crusa wardando pa e mes cana yega cerca nan na ward’i polis.