Training exitoso pa operador di tour cu enfoke riba producto y servicio ofreci

Recientemente a tuma luga e entrega di certificado na tur participante cu a finalisa e curso di ‘Tour Guide Excellence’ di forma exitoso. Aquila Center for Cruise Excellence, a facilita e curso aki den luna di september durante e siman di ‘Cruise Symposium Aruba’. 

Aquila Center for Cruise Excellence ta un organisacion reconoci mundialmente pa duna training na esnan den industria crucero manera companianan di tour, tour guides como tambe front-line operators. E proposito di Aquila su trainingnan ta pa mehora e experiencia di bishitantenan a traves di excelencia den servicio. 

Durante e trayecto aki cu a cuminsa e ultimo siman di september, participantenan a ricibi training riba diferente area cu ta importante enfocando riba e producto y servicio cu ta wordo ofreci na e bishitantenan. E ultimo dia di training, participantenan mester a haci un examen y despues mester a manda un video di nan mes splicando con nan lo haci nan tour, utilisando loke nan a siña den e curso. 

E participantenan cu a cumpli cu tur rekisito y a pasa nan examen di forma exitoso a ricibi nan certificado for di e departamento di crucero na A.T.A., den nomber di Aquila Center for Cruise Excellence.

Un danki y pabien na e siguiente companianan y organisacionnan cu e certificacion di nan empleadonan: Fofoti Tours, De Palm Tours, Kratos consultant, STEZO, AGW Tours & Service, Exotropic Tours, The Shack Aruba, Fundacion Parke Nacional Aruba, Royal Aruba Aloe, Fins & Feet Nature Tours, ABC Tours, Didi Tours, Grand Fish, Julio Tours, Aruba walking tours u Nr1Tours. 

Pabien na tur persona cu a ricibi nan ‘International Tour Guide Certification’! 

Den 2023 A.T.A. lo sigui inverti den training y oportunidadnan pa sigui forma e personanan cu ta responsable pa duna servicio na nos bishitantenan, considerando con importante excelencia den servicio ta pa nos isla.