Trahado individual awo lo por afilia su mes na sindicato FTA

Hopi biaha no ta facil pa un empresa pa un grupo suficientemente grandi pa por gana un referendum pa asina negocia CAO c’un sindicato.

Pero tambe Aruba su Constitucion ta bisa cu cada trahado tin derecho di afilia su mes na un sindicato. Esey a habri e posibilidad pa un trahado independiente  por bira miembro di FTA. Presidente di Federacion di Trahadonan di Aruba (FTA), mr. Hose Figaroa, a indica cu den e organisacion mes tabata tin algun obstaculo, den sentido cu no ta solamente trece un miembro aden. Pero mester por duna e miembro ey servicio tambe ta importante y e organisacion mester ta prepara p’e.

FTA tin como dos pa tres aña ta prepara e organsiacion pa por sirbi e demanda ey. Paden tambe e organisacion a crece y a independisa basta di nan departamentonan pa traha pa nan mes. A busca personal extra pa por handle esaki. Awo FTA tin e departamento huridico, unda cu e huristanan ta traha den cas mes y asina por duna servicio huridico mas lihe. Door di haci esey a prepara pa duna e servicio di miembresia independiente. Ta un servicio cu por duna door cu e demanda t’ey pa varios aña caba, pero pa haci esey mester a hacie na un manera responsabel.

Aña pasa, Figaroa a sigui bisa, FTA a contrata un compania externo pa haci un investigacion di kico ta e deseonan di miembresia individual, pero tambe kico asina ta e servicionan cu e miembro individual ta spera di FTA. A base di e investigacion extenso haci na maart di aña pasa, a saca e puntonan mas importante pa e servicio cu e pueblo eyfo ta desea y a base di esaki a prepara un pakete pa miembresia individual

Miembresia individual ta algo nobo na Aruba y e ta parti di evolucion di sindicalismo y evolucion di FTA como sindicato. E definicion di evolucion ta e proceso gradual di cambio di desaroyo. Y esey ta loke FTA ta haciendo, ya cu e tin cu bay cu tempo. Un di e caracteristicanan di sindicalismo ta cu hopi hende ta haya cu sindicalismo a keda pega den tempo, e no ta brinda locual e trahado ta pidi. E trahado di 2023 no ta e trahado di 30 pa 40 aña pasa. E mercado laboral di 2023 no ta e mercado laboral di 30 pa 40 aña pasa. E trabou riba su mes tampoco ta esun di antes mas. Como sindicato mester adapta bo mes na e cambionan aki. Sindicato mester por duna servicio unda cu e trahado mester servicio y no solamente unda cu e sindicato ta haya unda cu mester duna servicio. Y esey ta hustamente loke ta e base di miembresia individual.

Ademas, un parti importante ta cu e miembresia ta uno totalmente confidencial, dus e ta un relacion entre e trahado y FTA, unda cu e pagonan no ta sosode via di e dunado di trabou. En principio e dunado  di trabou no mester sa cu e trahado ta afilia na un sindicato. E no ta situacion ideal, ya cu e ta un derecho constitucional di tur trahado pa bira miembro di sindicato. Pero echo ta cu esey ta un drempel pa hopi trahado pa bira miembro di sindicato, ya cu hopi trahado tin miedo pa nan dunado di trabou haya sa cu e ta afilia na un sindicato.

Pero un dunado di trabou no por stroba su trahado di afilia su mes na un sindicato. Como miemrbo individual e trahado ta bay tin su beneficionan. pero e mas importante ta cu e trahado tin siguridad cu tin cualkier problema na pia di trabou, por ehempel si e dunado di trabou kier cambia e orario di trabou, kier cambia e beneficionan y tambe e salario. Como miembro di sindicato, e trahado den cualkier di e casonan ya menciona, e tin acceso total na e team di FTA.