Trahado di Ling & Sons a protesta: Gerencia y trahado no ta yegando na otro

E trahadonan di Ling & Sons a protesta y a haci esey hunto cu nan sindicato Federacion di Trahadornan di Aruba (F.T.A). Esaki a pasa despues di e reunion cu a tuma luga unda cu ambos partido a trece dilanti nan diferencia di opinion. Pero e negociado a bisa cu 80% di trahado no ta produci y esey tabata suficiente pa pone F.T.A. lanta fo’i mesa.

Rudy Geerman, presidente di F.T.A., a indica cu un biaha mas e trahadonan mester a yega leu pa protesta pa motibo loke ta haci cu nan no ta corecto. Na e momentonan aki ta negosha na mesa un señora Hulandes y nan ta haya e persona aki como basta arogante. F.T.A. a discuti basta den e prome negociacion cu a tuma luga dos luna pasa.

Awe a sinta y un biaha mas a bay den mesun direccion, pasobra segun e persona aki e no lo firma nunca un CAO pa duna aumento. E kier pone un aumento basa riba evolucion, pero e sindicato a para firme y mustrando di no ta kere den esey, y a lo menos e proba nan cu esey ta traha. Durante e reunion e Hulandes no por a haci esey y despues el a expresa cu dos delegado ta tranca e negociacion. Ta dos delegado cu ta bisa di tin mal contento y esey no ta berdad, segun Geerman.

E sindicalista a señala cu e persona aki a yega leu di reta un dje delegadonan, pa bin cu nan y mustra nan malcontento. Geerman a indica cu cos no ta bay asina, pero e persona a bira bisa cu 80% di e trahadonan di Ling & Sons no ta produci bon. Como cu su persona sinta na mesa a tende esey, e no a acepta esaki. Esey a conduci cu e sindicato a lanta fo’i mesa y para pafo cu e trahadonan pa protesta.

Edwin Montsalve, shop steward, a bisa cu nan protesta tin di haber cu maltrato, faboritismo di gerencia cu cierto trahado. Nan ta haci uzo dje cantidad chikito di trahado ey pa pone presion riba tur otro trahado. El a indica cu 85 trahado ta miembro dje sindicato y gerencia cu a bin di Boneiro of Corsou a laga sa cu nan ta floho, nan no ta traha ni ta responsabel. E no ta di acuerdo cu esaki.

Segun Montsalve, tur trahado cu a protesta no ta contento cu e procedura di gerencia. A informa nan cu ta bay califica nan cu punto.Pero door dje supervisor, e persona cu nan a busca pa presiona, ta duna mal punto y esey ta haci cu ningun di nan ta haya locual a trece como proposicion.

Pa mas lesa TREMPAN.COM.