Tradicion di “Ham Event” ta continua: MetaCorp a celebra un aña exitoso cu tur empleado

“E acogida ta hopi grandi”, tabata e prome comentario di Eddie de Veer, CEO di MetaCorp, durante e “Ham Event” cu e compania ta organisa tur aña. MetaCorp a bay dilanti den aña 2022 y esey ta netamente danki na su trahadonan. Y como tal a celebra cu nan durante un evento bon atende na Balashi Beer Garden hunto cu presentacion di Rincon Boys.

Manera ta e tradicion, e directornan di e compania, esta Eddie de Veer como CEO y Guus Slabbekoorn como CFO, hunto ta grill hot dog pa centenares di empleado di tur nan sucursalnan. Di e forma aki trahadonan di un compania ta topa di otro compania y tur hende por socialisa, memey di musica, co’i come y un bar bon surti.

Tradicion di casi 30 aña

E tradicion aki ta data for di hopi aña pasa caba, ora cu a cuminsa parti un pia di ham na tur empleado di e compania. Nan tabata haya nan basket na trabou mes. Pero rond di aña 1994, MetaCorp a dicidi di organisa un evento pa asina e empleadonan por a topa cu otro. A organisa e prome “Ham Event” riba e parkeerplaats di Renaissance Suites, banda di Wilhemina Park. Di eynan, tur aña ta organisa e “Ham Event”, combina cu bon musica y bon ambiente.

Orguyoso di e empleadonan

Eddie de Veer a menciona cu durante pandemia, e empleadonan di e diferente companiananan a enfoca nan mes riba con pa innova y desaroya. A prepara pa ora e pandemia a pasa, pa e compania por sali duro bek. A yuda pa trece solucion pa e problemanan cu a presenta. “Nos a traha un miho compania den e momentonan ey”, asina e CEO a comenta.  Hunto a logra forma un miho compania y ora cu a sali afo fo’i e pandemia, MetaCorp tabata cla pa ranca sali!

Aña 2023

Pa otro aña, manera tur aña, lo bin cu su retonan, sinembargo, Eddie de Veer ta sigur cu e trahadonan di MetaCorp ta prepara. E energia pa sigui bay padilanti ta presente den tur trahado. De Veer ta di pensamento cu, sin importa kico presenta, lo purba haci lo miho cu por. E forma con a organisa e companianan durante e ultimo dos añanan aki, sin duda ta haci nan resiliente y capaz pa sigui progresa.

Bay pocopoco den trafico

Mensahe final di Eddie de Veer ta pa tur hende bay pocopoco durante e temporada aki y  “si bo ta bebe no stuur”. Y dimes…disfruta responsablemente cu bo producto local Balashi y Chill. Ta encurasha celebracion, pero corda semper pa percura pa tin un otro persona pa stuur, un hende cu no a consumi alcohol.

Tocante MetaCorp

MetaCorp ta existi desde aña 1920 caba y a start den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den APEX y Ecotech. Despues di dos guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi. E compania a sigui desaroya cu apertura di New York Laundry y EcoGas.

MetaCorp ta e empresa comercial mas bieu na Aruba cu mas di 100 aña di existencia continuo. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talento manera Eddie de Veer y Guus Slabbekoorn na cabes di e compania.