Despues di a reuni cu su delegadonan y prome cu reuni cu su miembronan Trahadonan Organisa di Sector Publico di Aruba (TOPA) a dicidi pa saca un comunicado den cual e ta splica kico ta e oferta haci door di gobierno riba e tema di indexering.
Segun e splicacion cu por lesa den e declaracion cu el a manda aki, gobierno ta ofrece 11.7%, cu ta hopi menos cu e 14% cu mayoria di sindicato ta exigi. Sinembargo ora cu bay calcula e 11.7% aki den e sumanan cu kier duna den diferente prima, e no ta yega na e porcentahe aki.
Manera ta conoci, for di 22 di januari ultimo gobierno a invita sindicatonan pa un reunion riba e tema di indexering. Y hustamente den e reunion aki, manera 24ora a informa anteriormente, a ricibi diferente documento a base di cual cu gobierno ta bisa cu a yuda pa yega na e oferta di 11.7% cu nan a ofrece e sindicatonan na indexering pa nan miembronan.
Tambe ta berdad, y esaki TOPA ta confirma den su comunicado, cu e sindicatonan a pidi mas informacion p’asina nan prepara nan mes miho y pa reenforsa nan exigencianan.
TOPA ta splica cu cada sindicato despues a bay den nan directiva / delegado / miembronan pa informa riba e proposicion di gobierno tambe pa bini cu nan punto di bista. TOPA mes a reuni dia 5 di maart ultimo cu su delegacionnan pa pasa nan e informacion ricibi.
Di otro banda e ta bisa tambe cu dialuna tur e sindicatonan a bini hunto pa papia riba posicion cu cada un ta tuma pa despues sinta cu gobierno.
Si el a menciona kico ta e proposicion di gobierno. Y esaki ta pa hinca Bashi Premie y reparatiepremie den e bezoldiging pa aumenta acumulacion di pensioen (esaki ta nifica cu ta hay’e mensualmente den e salario en bes di un biaha pa aña cada un), cuminsando na 2025. Esaki ta si acepta e oferta. Di otro banda nan ta propone pa aumenta Gelijkbedrag cu 850 florin y ta bira 2979 y e pago aki si ta tuma luga segun custumber.
A reparti hunto cu e comunicado aki un tabel cu ta ilustra e proposicion di gobierno. Den e dos ultimo columnanan por mira e suma y porcentahe di compensacion pa perdida di cumpra / aumento bruto mensual, basa riba e proposicion di gobierno. Sinembargo, nan ta indica cu gobierno ta papia di 11.7% pero e cifranan no ta mustra esey.
“E ultimo columna ta aumento den porcentahe di e suma cu ta uza pa calcula acumulacion di pensioen y no ta e porcentahe cu bo futuro pensioen lo aumenta. AE ta debi cu esaki ta depende di entre otro cuanto aña cada persona tin of falta pa acumula. Por conclui si cu algo mas ta wordo acumula y esaki ta aumento futuro pensioen.”
E sindicato ta bisa cu lo reuni den e siman di 18 pa 22 di maart cu su miembronan pa informa di e tema aki y contesta pregunta.
E declaracion aki ta firma pa Axcel Figaroa, vice-presidente di TOPA.
Comment