Ton Rojer (Utilities): Mester cuminsa uza nos espacionan di manera mas eficiente

Den e ultimo temponan, na tur nivel mas halto di gobernacion, e topico di energia, ta e topico principal di tur combersacion, rond mundo.

Por bisa cu tin un crisis di energia cu a crea un crisis economico cual ta crea un crisis social. Pero aki na Aruba, por a mira algun anuncio importante, e.o. cu Utilities ta bay den direccion di Parke di Molina nobo. Ton Rojer, director di Utilities Aruba NV, a cuminsa na bisa cu for di 2019 a cuminsa distancia for di Heavy Fuel Oil, pa bay mas den direccion di energia renobabel. Esaki ta debi cu aki na Aruba tin solo y biento na abundancia y por haci bon uzo di e fuentenan aki. Alabes por contribui tambe na e cambio climatico, cu ta un di e topiconan hopi importante na nivel mundial. Mundo henter ta den un crisis climatico actualmente y tur esaki ta a consecuencia di e cambio climatico.

NO POR SIGUI WANTA E GASTONAN

Ursula van der Leyen , Presidente di e Comision Europeo, durante e State of the Union, a referi na e plan di impuesto extraordinario y di limitacion di entrada. El a bisa cu, aunke e beneficionan no tabata necesariamente algo, ta un eror di ricibi entrada y beneficio extraordinario, door di beneficia di e guera y tur esaki a costa di e consumidornan. Es decir, el a pidi e companianan di utilidad Europeo pa wanta un rato cu nan ganashi.

Aki na Aruba, Gobierno a bisa WEB y ELMAR wanta un rato cu boso ganashi cu pueblo tin cu bay haya un bentaha. Esey ta e mesun paso cu Aruba a tuma, pa wanta un rato. Pero Aruba su desbentaha ta nos no ta mes grandi cu Europa y e companianan di utilidad no por sigui carga tur e gastonan mas.

ENERGIA RENOBABEL

Na 2008, a cuminsa cu e molina na Vaderpiet, c’un capacidad di 30MW, cu a drenta den funcion na 2009. Despues di esey, nada mas a sosode y awo ta na 2022. Mester cuminsa haci algo y rapido. A instala algun parke solar, pero esakinan ta tuma mas espacio cual ta schaars na Aruba. Y Aruba no por sigui crece mas, ta un isla chikito. Esaki ta haci cu mester cuminsa uza nos espacionan mas eficiente. E molinanan ta esunnan cu ta produci mas y ta tuma menos espacio.

Door di esaki a bay haci un estudio, basa riba e mesun estudionan cu ta indica cu mester keda na 850m leu for di un cas habita, Rincon den e area pariba ta e area mas ideal. Recientemente Utilities a saca un Expression of Interest, pa e companianan cualifica por haci nan inversionnan y cu por haci e proyectonan aki, tambe financieramente y cu por uza e espacio disponibel di e miho manera, segun Ton Rojer, Director di Utilities NV.  

Mas y mas pais ta bay den direccion di energia renobabel y Aruba no por sigui warda mas pa tuma e stap aki.  

Pa un relato mas amplio, lesa TREMPAN.