Tin dos sospechoso deteni: Problema di gang a caba na tiramento formal

“Por spera mas tiramento den e dianan nos dilanti. E cos no a caba aki”, esey tabata un remarca di por lo menos un banda di e problema di gang aki. Obviamente tabatin un reglament’i cuenta, cu mester a caba fatal, pero e tiradonan a faya den nan intento. Awe por lo menos dos di nan ta deteni, pero por spera mas detencion den e caso aki ainda. 

Ya caba amigonan di e victimanan a laga sa caba cu cos lo no keda asina y lo bin un contesta bek como vengansa. Ta un desaroyo peligroso cu awor polis ta teme masha pa e dianan di carnaval, specialmente eventonan anochi. Ta purba pa keda cla cu e detencionnan den forma rapido, prome cu e gangnan mes busca otro y tira atrobe den rabia. E asunto di tiramento den area publico ta masha peligroso mes, pasobra asina hende inocente por resulta victima.

E caso 

Tabata diadomingo pa 6:12 am cu a notifica polis di un “accidente” serio dilanti Misa di Noord. Pero ora e prome patruya a yega na e sitio, a topa cu un escena di pelicula. A topa dos auto mal kibra, hopi huls (resto di bala di un arma di candela) benta tur caminda, mancha di sanger y hopi glas debi na e impacto fuerte.

Remarcabel ta cu no tabatin ningun hende na e sitio, pues ni chauffeur, ni pasahero y tampoco testigo. Solamente dos auto kibra y prueba cu tabatin tiramento na e sitio.

Pa mas o menos 6:30 am a drenta informe cu cuater victima a yega Spoedeisende Hulp (SEH) na dr. Horacio E. Oduber Hospital. Di e cuater victimanan, dos tabatin herida di bala!

E victimanan 

Prome informe ta indica cu un di esunnan cu tin herida di bala ta Stephen Martina, yiu di defunto Juni Regales. Ta un hoben bon conoci di husticia, considera como un persona peligroso. Stephen tabata sinta na banda y un bala a scharmaai e den su pecho. Si no tabata pa un of dos centimeter mas, e bala lo a perfora su curason. Un otro bala a perfora su pols, banda banda. Dr. Hunt Riley mester a oper’e mesora y por a bay cas despues.

E chauffeur di e auto tabata un tal “Coco”, cu tambe ta bon conoci pa husticia. El a haya bala na su pia links ya resulta herida.

E sospechosonan

Na hospital mes polis a detene e sospechosonan, posiblemente esunnan den e otro auto. Ta trata aki di Edwin Arrieta y un tal Ortega. Nan lo sa mas di e caso aki, di e tiramento, pasobra nan tabata den e auto cu lo a tira. No ta conoci cuanto hende tabatin den e auto di nan, pero si cu tabata mas cu dos. Pues na cualkier momento por spera mas detencion. E fam E. ta zona hopi den boca di e gangnam envolvi. Nan ta acus’e di lo t’esun cu a tira mes mes.

Nan a tira pa mata

Por lo menos un di e victimanan a describi e situacion pa nos. Nan tabata den un club nocturno cerca di hotelnan highrise y e otro hombernan tabata keda wak nan cu cara rabia. Ora nan a sali bay, diripiente banda di Misa di Noord e auto a pasa nan y a cuminsa tira riba nan. No a duna e otronan chens mes pa responde, aunke nan ta insisti di no tabatin arma di candela den e auto. “Ta un fiesta di bala tabatin”, asina nan a conta nos. Nan mester a sak den auto pa nan no mata nan, asina mes bala a scharmaai of alcansa nan parcialmente, pero nada serio. Coco a maniobra cu e auto pa dal den e otro auto pa nan por a stop di tira, sino nan lo a sigui. Kico ta motibo cu kier a mata nan, no ta conoci.

Nan tabata dos auto

Mester menciona cu, pa confirma cu e atentado tabata planea, nan a yega den dos auto. Pues un auto a basha bala y un otro auto a sigui nan riba un distancia. Asina cu e autonan a dal den otro y bay dal den pal’i luz, mesora un otro auto a presenta na e sitio, bay cu e gang y disparce for di e sitio. E victimanan a keda scondi den auto, comosifuera nan a muri. Ora cu e otro auto a move, nan tambe a core baha y a pidi lift pa nan a yega hospital pa ricibi tratamento medico.

Confrontacion na hospital

Como cu ta un solo hospital tin na Aruba, mesora e dos gangnan a topa otro eynan. Den un salimento di camber pa otro, e victimanan a reconoce por lo menos un di e tiradonan y a sali su tras. E homber di fam E. a sali na careda for di Spoedeisende Hulp (SEH) pa evita cu nan a agridie eyden. E homber ey no ta deteni ainda, pero obviamente e sa mas of tabatey na e sitio di crimen.

Version di polis

Lito Lacle, vocero di Cuerpo Policial Aruba, a sigura cu recherche di Noord tin un idea caba di e caso y cu pronto lo bin detencion. E prome indicacion ta parce di ta problema di gang. Martina ta procedente di Dakota. Polis ta investigando ambos caso awo, esta recherche p’e parti criminal y polis di trafico p’e parti di accidente. Tur cos ta mustra cu tabatin un persecucion, losmento di tiro, cu consecuencia cu e autonan a bay dal. Un di nan a dal den un pal’i luz. Un di e autonan tin perforacion di bala riba dje.

No a haya arma 

Lito Lacle a confirma cu no a haya ningun arma di candela na e sitio di desgracia y tiramento. Condicion di e victimanan tampoco ta conoci ainda. Ta teme si cu e tipo di actividad criminal asina por influencia e dos weekendnan di carnaval cu lo bin ainda.

Mas tiramento 

No ta conoci si ta e mesun gangnan cu a tira riba otro na Noord, pero cerca di rotonde di Tanki Leendert riba Watty Vos Boulevard tambe tabatin bashament’i bala marduga. Tin un chens grandi cu esey ta un caso separa! Polis ta na altura di por lo menos tres caso di tiramento awe marduga. Cerca di un bar na Tanki Leendert, cerca di un bar dilanti hotelnan Highrise y dilanti di Misa di Noord. Ora polis a yega na tur tres luga, no a logra haya ningun hende, ni victima ni sospechoso.

Polis awo ta investiga si e caso na Tanki Leendert lo tin di haber cu esun na Noord. Aki ta papia di un homber inicial J.D. cu lo ta esun cu a tira riba un motociclista. E bala no a alcansa e motociclista “monkey” cu despues a regresa den un auto cu parce esun cu tabata envolvi den e tiramento despues na altura di Misa di Noord.