Team Snor cla pa enfrenta Biba Lekker den domino

Diasabra awo, 11 di maart, cuminsando pa 8:00 pm, un tabla lo bay bula halto aya n’e conocido y mundialmente famoso Domino Square Garden net n’e grens entre Kudawecha y Calabas. E ‘yuchi’ di Team Snor, esta Pariba Legends DT, biaha pasa a haya ‘een standje’ cerca Biba Lekker DT, bou guia di capitan Trimon.

Despues di a haya ‘op hun donder’ di ‘El Padrino’ himself, nada menos cu ‘Snor’ Perez, a dicidi cu ta e y su team mes lo tin cu bay saca e sla aki afo pa su alumnonan di Pariba Legends. Captain Trimon ta djis hala schouder y cu hari den cachete ta bisa “un pa un, tur ta haya”!

Asina ta shonnan amante di domino estilo candela, prepara boso mes pa un encuentro ora cu e unico matematico den domino, Nelson ‘Snor’ Perez, baha cu su gang pa trek e cos aki recht contra Biba Lekker! Den ultimo tempo ta parce cu Team Biba Lekker a cuminsa crece y bira un monster cu ta guli un team tras di otro manda abou. Di otro banda, e mente incansabel di Snor tampoco no ta para, unda un y tur ta ansioso pa wak cu ki ‘strategia nobo’ Snor lo bin e biaha aki.

E bataya aki ta cuminsa 8:00 pm y manera ta di custumber na Domino Square Garden. Entrada pa publico en general ta completamente gratis y durante halftime, e pasapalonan ta lora en abundancia totalmente por nada. Yega y bin disfruta di otro anochi ‘high tension’ n’e unico Domino Square Garden.