Te cu awo: Marina Real Hulandes a intercepta 35.000 kilo di droga

Marina Real Hulandes e aña aki a logra internista un cantidad record di droga den Region Caribe Hulandes. Esaki a sosode den cooperacion cu e partnernan internacional. Zr.Ms. Holland den e ultimo simannan cu a transcuri, a topa cu cuater transporte, pa un cantidad di mas of menos 3.000 kilo di cocaina. Cu esey e total den 2022 ta yega casi 35.000 kilo na contrabanda cu a intercepta.

Durante e ultimo detencionnan cada biaha di nobo e avion di patruya di Wardacosta Region Caribe a descubri un ‘go-fast’. Riba esaki un helicopter di Wardacosta Mericano ademas di e botonan rapido FRISC a keda desplega. Esakinan a logra di stop e traficacion di droga.

Na sitio mes a detene e sospechosonan. Nan a keda entrega na e autoridadnan Mericano pa persecucion na Merca. E cantidadnan di droga entretanto ya a keda destrui.

BARCO PATRUYERO

Zr.Ms. Holland desde october 2022 ta e barco di patruya den Region Caribe Hulandes. E barco di patruya aki ta traha hopi di acerca durante e operacionnan anti droga cu Wardacosta Mericano y Wardacosta Region Caribe Hulandes.

Zr.Ms. Holland den mas o menos 2 luna ya a logra intercepta casi 10.000 kilo di droga. Zr.Ms. Friesland a percura cu casi 4.000 kilo no a logra subi mercado y Zr.Ms. Groningen a percura pa captura di mas cu 21.000 kilo total.