Taekwondo Team Aruba ta bek cu seis medaya

24ora.com a ricibi e delegacion encabesa ex campeon Monica Pimental yegando for di Fort Myers na Florida. Como entrenador, Pimentel ta masha contento cu e resultado caminda a bay cu seis atleta cu a participa den tres categoria y a regresa Aruba cu un total di seis medaya.

A gana dos medaya di oro, dos di plata y dos di brons den e categorianan Adulto, Junior, Cadet y infantil. E entrenador a splica cu mayoria mucha tin experiencia den competencia internacional, cu excepcion di Isabella Bogevad den categoria Junior y Xavian Farro, categoria Infantil, kende ta un Yellow Belt y ya ta destaca na Aruba.

E training ta bay bon, segun Pimental pasobra e “muchanan ta hopi dedica na nan entrenamento. E entrenamento por ta hopi exigente, vooral ora bo ta na e nivel elite.” Na esaki ta pertenece Joshua Klaber y Jourde Klaber, kende ta preseleccion di Aruba Taekwondo Bond. Tur hende ta train mainta dos ora y atardi dos ora mas, di dialuna pa diasabra.

Joshua Klaber a gana dos pelea pa bay cu un medaya di oro. Jourde Klaber a gana un pelea y perde e di dos, biniendo cu medaya di plata. Kianna Krozendijk a participa den Cadet y Junior como preparacion pa otro aña. El a gana oro den junior y plata den cadet. Xavion Faro kende ta su prome epelea den infantil logrando un medaya di brons. Isabella Bogevad den junior bou 44 kg y a logra metaya di brons

Pimentel: “Ta gradici pueblo, tur cu ta deposita nan fondo ora ta collect ora cu ta para riba brug. Ta gradici pa tur e apoyo. Sa cu e muchanan a representa Aruba y ta spera di por sigui conta cu pueblo su sosten.”