Tabata 75 aña pasa cu Shon A. Eman a haci entrega di mocion historico di 18 di maart

E fecha 18 di maart ta core manera un liña cora den historia di Aruba. Nos ta recorda cu 75 aña pasa un lider determina a yega Hulanda, den su poder un documento cu 2147 nomber di firmante, cu un mocion bon prepara cu a entrega y a wordo acepta na Mesa Rondo, Den Haag.  

“De Conferentie Nederland-Suriname-Curaçao: kennis genomen hebbende van de wens, door de ter conferentie aanwezige afgevaardigde van de bevolking van Aruba naar voren gebracht, om aan dat eiland bij de instelling van een nieuwe rechtsorde voor het Koninkrijk een afzonderlijke status te verlenen, teneinde op staatkundig, economisch en cultureel gebied aan de bevolking van het eiland bevrediging te schenken”….

A scoge dia 18 di maart pa introduci nos simbolonan nacional: nos bandera y nos himno. Ta celebra Aruba su Dia Nacional, su Status Aparte riba e fecha di 18 di maart. Esaki tin su motibo, e tin su historia palpante su tras. Un historia cu t’ey pa e generacionnan cu bin. No ta asina sin mas a scoge e fecha di 18 di maart. E aña aki, Aruba ta celebra e hubilacion di Platinum ya cu ta 75 aña pasa cu Shon A. Eman a entrega e mocion, conoci como ‘Mocion 18 di maart’, cu e deseo ferviente di e pueblo di Aruba ta ‘baas den su mes cas’, na Mesa Rondo na Den Haag.

Na 1986 e anhelo di e pueblo a keda cumpli, esaki despues di un lucha largo y tenaz cu a cuminsa na inicio di siglo 20. 

18 di maart 1948

Entre 28 di september 1947 y 11 di januari 1948, e lidernan politico Henny Eman sr., su yiu Albert ‘Shon A’ Eman y Aristides Wever, compaña pa Juan Chabaya ‘Padu’ Lampe, a organisa no menos cu 42 encuentro rond Aruba. Esaki den un tempo cu no tabatin e infrastructura cu tin awe. No tabatin medionan social, coriente no tabata algo comun y un biahe pa Hulanda tabata manera un biahe rond mundo, y asina mes a logra cosnan grandi pa e isla chikito aki. Lampi di kerosin tabata ilumina e reunionnan aki. Un pueblo determina y consciente tabata asisti pa firma un peticion pa ta ‘baas den nan mes cas’. Resultado di e encuentronan aki tabata un peticion cu nomber y firma di 2147 hombernan Arubiano. E tempo ey hende muhe no tabatin derecho di voto ainda.  E 2147 Arubianonan balente aki a duna muestra di e determinacion di un pueblo pa yega na su soberania. E protesta, e anhelo pa ta ‘baas den nos mes cas’ no tabata algo nobo den e temponan ey, pero si tabata e prome bes cu Arubianonan a tuma un posicion firme y esaki a duna su fruto. 

E hoben politico y abogado Shon A Eman hunto cu un delegacion a biaha pa Hulanda y durante un conferencia di Mesa Rondo, cu simbolicamente ta marca e igualdad cu tabata kier den Reino, Shon A Eman a haci entrega di e peticion na su Mahestad Reina Wilhelmina. Algun siman despues, riba un diamars 18 di maart 1948, Shon A a entrega den nomber di Aruba un mocion den cual e ta pidi  un ‘uitzonderlijke status’, e status aparte pa Aruba den Reino. Shon A, kende a keda Den Haag mientras su delegacion a regresa Aruba, durante un discurso ardiente y conmovedor a convence e delegacionnan di Hulanda, Corsou y Surnam durante final di e Conferencia di Mesa Rondo cu Aruba tin e derecho di tin un posicion extraordinario dentro di Reino. 

E mocion di 18 di maart 1948 y e peticion cu nomber di e firmantenan a keda acepta y a bira e fundeshi di nos autodeterminacion dentro di Reino Hulandes y a para na cuna di nos Status Aparte. Tur aña Aruba ta celebra e balentia y determinacion di esunnan cu a bay nos dilanti. Esaki ta wordo haci na monumento 18 di Maart durante un homenahe na tur esunnan cu den e periodo entre september 1947 y maart 1948 a construi e fundeshi aki.