Ta kere cu no por mara nan na CAO bieu: Post Aruba N.V. no ta doblega

Algun siman atras e trahadonan di Post Aruba N.V. a bay den manifestacion pa motibo cu nan kier haya e pago di 105 florin manera ta para den nan CAO. Gerencia di Post Aruba N.V. a manda un carta pa sindicato SEPPA riba e decision tuma.

Den e carta gerencia ta informa cu nan a reuni cu Minister mr. Geoffrey Wever, Raad van Commissarissen y miembro di directiva di Post Aruba N.V. pa atende e punto aki. Post Aruba N.V. ta di opinion pa motibo di e circunstancianan financiero, nan no por implementa esaki. Tambe ta existi suficiente motibo pa cancela of cambia e obligacion via e proceso hudicial.

Cu e carta aki, Post Aruba N.V. kier a aclara su posicion a pesar cu Raad van Commissarissen y accionista di Post a purba di haya un manera pa impedi e discusion legal, mientras cu ta brinda claridad n’e partinan pa futuro. No por mara Post Aruba N.V. n’e CAO. Tambe a informa cu pa januari 2023 e unico suma cu Post Aruba N.V. por paga e trahadonan ta 62.500 florin. Nan a acumula un perdida di mas o menos 52.000.000 florin y pa aña nan ta ricibi un capital fo’ Pais Aruba.

Door di e situacion financiero cu e compania ta den dje, esey ta e propuesta maximo cu Post Aruba N.V. por ofrece. E suma ofreci no ta negoshabel y lo vence automaticamente si SEPPA no acepta e propuesta aki den nomber di e trahadonan.