Ta importante pa mas persona ta capacita den CPR

Diadomingo ultimo a tuma un curso di Prome Auxilio y CPR na Club Kibrahacha. Esaki tabata specialmente p’e cursistanan cu ta haci e training aki pa prome biaha of pa esunnan cu nan carnet a caduca.

Azriah de Palm, boluntario y instructor di CPR y Prome Auxilio, a comenta cu tabatin algun persona di cas di cuido, cu a dicidi tuma e curso.

El a comenta cu e ambiente a bay hopi bon, cu hopi pregunta. Na final a haci un test cu mayoria di nan a pas’e.

Durante di e dia, e cursistanan a haya hopi informacion teoretico, esta con pa anda den un caso di emergencia, con pa actua y kico pa haci. Tambe nan a practica esey, cual a bay hopi bon.

Sigur e tabata un dia hopi intensivo cu hopi informacion, aunke ta algo cu por sigui practica. Awendia mundo a cambia, segun de Palm y lo ta hopi bon pa tin mas hende cu ta capacita pa por actua na comienso.

No ta tur biaha lo haya ambulance yega hopi lihe na un incidente. Loke ta purba di haci ta pa educa y informa e comunidad con importante e curso aki ta. Hopi hende ta bisa cu tin biaha cu e prijs ta tiki halto. Segun de Palm, nan ta purba mantene prijs abao pasobra e no ta bay pa gana placa. E ta bay pa traspasa e conocemento n’e comunidad y asina aki haya mas hende cu por actua den un caso di emergencia.