Ta evalua pa kita maneho di asilo fo’i Minister Croes

E decision final no ta tuma ainda pero si discuti ampliamente e ultimo dianan aki na nivel di ambtenaarnan entre Gobierno di Hulanda y Gobierno di Aruba. E “Rijksambtenaar” nan cu a bin di Hulanda pa reenforsa e “vreemdelingenketen” ta mira y biba den carni propio e metemento politico den maneho di stranheria y specificamente cu asunto di asilo. Varios incidente, cu hasta a entrega keho na Ministerio Publico, ta prueba cu e minister encarga ta carece di un maneho integro y recto, specialmente ora ta tuma decision cu de facto ta Hulanda tin cu dicidi riba nan. 

Pero, como cu e departamentonan no ya cay completamente bou di dje, e minister ta hay’e forsa pa haci saltonan casi mortal pa toch pusha su maneho y purba haya su kier den Conseho di Minister pa e por tin “mas di bisa” den otorgamento di permiso di trabou y di estadia pa stranhero riba nos isla. E ta un proceso cu, historicamente, gobiernonan (di MEP tambe) a laga mita-mita entre dos ministerio pa esun por controla e otro. Pero cu cambio di gobernacion, Gabinete Wever-Croes II a opta pa uni e maneho y a kita DIMAS for di husticia y pone hunto cu labor, haciendo Minister Glenbert Croes hopi poderoso.

Minister kier suspende top di DIMAS

Aunke Minister Glenbert Croes tin mas di un siman caba na Merca pa reuni cu Gobierno eynan pa habri caminda pa Aruba por haci negoshi toch cu Venezuela y specificamente cu PDVSA, toch su conseheronan ta purba pa di tur forma yega na poder den DIMAS. Asina siman pasa a laga Minister Dangui Oduber, siendo Minister di Labor, Energia y Integracion interino, firma un prohibicion di entrada pa hurista di DIMAS, esta mr. Jacqueline Harewood. Fuente den Cocolishi ta indica cu a bin ordo pa firma dos suspension, pero cu Minister Oduber a opta pa firma un so. Parce el a opta pa laga su colega Croes mes bin atende su problema, asina e ta cla di su biahe di trabou.