Ta di tres pa e aña aki: Boneiro ta experencia su di dos blackout awe

Awe merdia pa 3:15pm, net na momento cu e wega di campeonato mundial di futbol a cuminsa, cu e ekipo faborito Brasil hungando, cu WEB Bonaire a experencia problema den produccion di coriente, cu a conduci cu henter su planta a cay. Consecuentemente e “isla di flamingo” a experencia un blackout total den suministro regular di coriente. 

E fayo aki a presenta na masha mal momento, pasobra hopi hende tabata claba riba nan television pa sigui e wega di futbol di cerca. Mientras cu di otro banda, den e oranan ey comercio ta den su peak. Siendo un dia special “Thanksgiving”, hende tabata di compras ora diripiente tur mester a cera y stop operacion pa falta di suministro regular di coriente. 

Di otro banda, e fayo aki no ta prome pa e aña aki. Dia 22 di februari ultimo, ya e planta di produccion di awa y coriente a conoce un blackout. E tempo ey ainda bou maneho di Alfredo Koolman, cu awendia ta director di WEB Aruba. 

Awe tin un director nobo cu apenas un luna na poder. Ya el a experencia no un, sino dos blackout riba un solo dia. Suficiente pa e pueblo Boneriano ya hopi disgusta pa e forma aki di traha y di maneha e planta di produccion. Ta sinti cu WEB no ta consciente di e daño enorme cu nan ta causa na economia di e isla y pa e inconveniencia di tur ciudadano. 

E prome blackout tabata 3:15 pm y e di dos pa 7:30 pm. Te ainda e isla ta den scur y no tin ora pa haya coriente bek tampoco. Un ciudadano a bisa nos: “Boneiro a haya un early Blackout”