Ta bin fondo adicional pa cuminda gratis n’e scolnan basico di islanan BES

Ta bin e fondonan adicional pa duna e alumnonan cuminda gratis riba e scolnan basico na Caribe Hulandes (islanan BES). Esey minister Schouten di maneho di pobresa a anuncia.

Siman pasa a bira conoci cu na Hulanda na 500 scol basico cu hopi alumno vulnerabel lo entrega desayuno gratis. E iniciativa aki tambe ta conta pa e alumnonan di Hulanda Caribense. E siman aki tabatin contacto intensivo cu e entidadnan publico pa averigua con por regla esaki, tambe pasobra ya caba tin bon iniciativa local. E gabinete ta buta 250.000 euro disponibel mesora pa por amplia e iniciativanan existente y pa bin cu medidanan adicional.

Minister Schouten: “Nos mester evita cu e muchanan ta bay scol cu un stoma bashi pa motibo cu e gastonan di bida ta bira mucho caro pa e mayornan. Esaki no ta solamente insaludabel, pero tambe ta hopi dificil pa concentra cu un stoma bashi. Pa e motibo ey e gabinete ta buta fondonan disponibel mesora pa cuminda adicional pa e scolnan basico di Caribe Hulandes.”

E entidadnan publico ta guia distribuimento di e cumindanan pa e scolnan. Esaki ta conecta bon na e rol cu e entidadnan publico tin caba. Di e forma aki e interpretacion concreto ta keda determina localmente. E cuminda extra gratis ta keda distribui den un periodo di 4 luna. Banda di esey ministerio di OCW denter di poco ta cuminsa cu ehecucion di un plan pa lunch na e scolnan na Hulanda y Caribe Hulandes.