Ta bin cu tanki mas grandi na Alto Vista pa satisface demanda

Den e paisahe di Noord tin algo cu ta falta ultimamente y esey ta e tanki di WEB riba sero di Alto Vista. E compania di produccion y distribuimento di awa ta sigui continuamente un programa di mantencion di e shete tankinan cu tin riba nos isla y cu nan funcion ta pa mantene e nivel di presion di awa na cada conexion. Den e caso di Alto Vista, e tanki ta data di 1992 y despues di 30 aña, a yega na tur pa bin cu un nobo.

Vocero di WEB Aruba N.V., Asja Dongen a brinda un informacion mas detaya di e proyecto cu e reemplaso di e tanki na Alto Vista ta forma parti di dje. T’asina cu e trabounan a cuminsa dos siman pasa cu e desmantelacion (torno) di e tanki existente. E companianan ta asina leu caba cu a desarma henter e structura di hero y awo ta trahando pa desmantela e fundeshi cu esaki tabata riba dje. 

E siguiente paso ta bira e preparacion di e tereno pa construccion di un fundeshi nobo. E motibo ta cu e tanki nobo ta uno mas grandi y di diferente dimension. Mientras cu e tanki anterior tabatin un capacidad di 13 mil meter cubico, esun nobo ta mas hancho y mas plat, pero tin capacidad di 18 mil meter cubico di awa. E structura di e tanki mes ta bin for di exterior y ta traha na midi. Un bes cu e yega Aruba, profesionalnan local lo ta encarga di arma esaki den otro.

WEB Aruba N.V. ta pasando den un proyecto di mehoracion di su red di distribuimento di awa, cual ta inclui henter e sistema di tuberia rond di e isla. Fuera di renobacion y construccion di tanki nobo, tin tambe renobacion di 800 kilometer di tuberia cu ta cubri e isla y e sistema di pomp cu ta conoce un cambio grandi. E proyecto tin un duracion di cinco aña, tambe reparti den fase. Por ultimo, Dongen a expresa e gradicimento di WEB Aruba N.V. na e habitantenan di e bario pa nan cooperacion.

 Pa e relato completo, lesa edicion di TREMPAN