Stakeholders a atende e Cruise Symposium Aruba 2022

Diamars ultimo a tuma luga e Cruise Symposium Aruba 2022, un evento cu sa tuma luga anualmente y ta regresa despues di dos aña di ausencia. Organisa pa Aruba Tourism Authority, a acopla e evento na e programa pa Dia Mundial di Turismo. E atardi den ballroom di Marriott Resort a consisti di presentacion di estadística y plannan di parti di ATA mes, como tambe Aruba Ports Authority y tambe expertonan di e industria riba kico ta e tendencianan di e mercado.

Stakeholders manera Shermaine Kelly, manager di ABC Tours ta masha content cu atrobe ATA ta organisa un simposio asina, caminda nan por participa pa pone nan mes na altura di e plannan cu tin pa cu turismo, specialmente e turismo crucero. ABC Tours ta ofrece nan servicio na barconan di Carnival y Aida, entre otro.

Marc Figaroa, como director di Aruba Ports Authority, a papia di con e sector a bin ta recupera y kico por bay spera. E ta considera e evento un oportunidad pa reconoce y sigui sostene e producto cu ta bon conoci internacionalmente door di proteha loke nos tin, hacie mas sostenibel posibel y trece balans entre e bishitante y comunidad.

“Nos bishitante ta buscando e experiencia local unico. Esey bo ta scucha cada bes ey’fo ora bo ta reuni cu liña crucero, tour operators,” Figaroa ta splica. “No ta importa cu nos tin e lama, pero e experiencia di sali cu un piscado y bin cushina e pisca. E sunset tambe ta algo cu nos ta custuma cu ne, pero pa esunnan den midwest cu no ta wak esey nunca, e ta un experiencia cu nan ta busca. Nos mester enfoca y promove mas experiencia unico pa nos bishitantenan.”