Parlamentario Pauletta awe a hiba un kombersashon ku minister di Salubridat, Medio Ambiente i Naturalesa sra. Pietersz -Janga. E motibu prinsipal pa e kombersashon ta e diferente retonan ku tin den e sektor di salú.
Durante e kombersashon sra. Pauletta a tres’é e entre otro e siguiente puntonan dilanti:
E situashon urgente di pashèntnan di wowo. Esta e echo ku tin un lista largu pa operashon di wowo na CMC, ku konsekuensia ku tin pashènt ku tin mas ku un aña ta warda riba nan operashon. Minister Pietersz- Janga a indiká di ta trahando riba esaki i awor e ta den fase di sinta ku e sektor. Un otro punto ku sra. Pauletta a trese dilanti ta ku mester evaluá e posibilidat pa hasi mas uso di e profeshonal optometrista, pa asina por baha e lista largu di espera na dòkternan di wowo.
Ademas sra. Pauletta a trese dilanti ku ta importante pa e akshonnan pa ku kasnan di kuido keda ehekutá. E kuido di nos grandi i personanan ku un malesa ta dependé di e akshonnan aki. I pa e motibu aki, ta urgente pa sigui kana e trayekto ku ya a keda enkaminá huntu ku federashon kasnan di kuido. Parlamento tin un reunion pendiente ku minister ofer di e tópiko aki i sra. Pauletta ta spera ku mas pronto ku ta posibel por yama e reunion.
Tambe sra. Pauletta a papia ku minister tokante aña di limpiesa. I ku mester dediká atenshon na e parti di konsientisashon i spesialmente konsientisashon di mucha. Den kuadra di esaki sra. Pauletta a duna diferente tep.
Na final sra. Pauletta a entregá e petishon pa kambia e formulario di yunan resien nasí ku fayesé durante parto òf promé. Ku e kambio aki, nos ta eliminá e doló ku algun mayor ta pasa aden pa duna nan yu un nòmber ofishal. Sra. Pauletta den pasado a entregá e petishon aki, pero lamentabel ku e petishon aki a pèrdè den e ministerio di GMN. Minister Pietersz -Janga a indiká di lo bai traha riba e petishon ku e rapides nesesario. Tambe sra. Pauletta a ekstendé un invitashon na Minister Pietersz Janga pa tei presentá na e konmemorashon anual Wave of Light, dia 15 di òktober próksimo.
Parlamentario Pauletta ta gradisí minister Pietersz – Janga pa e kombersashon i ta spera ku e diferente gruponan lo por haña oportunidat pronto pa sinta ku minister i tambe ku e intervenshonnan planeá tuma lugá huntu ku tur e stakeholdernan.
