Special p’esunnan 80+: Tea Party organisa p’e miembronan di OPPA tabata un exito rotundo

Diabierna atardi OPPA (Organisacion di Penshonadonan Publico Arubano) a tene un actividad yama Atardi pa bebe te cu nos grandinan 80+ (Tea Party 80 plus) na cas di OPPA situa na Primavera.

Comision Hunto Contra Soledad a hinca un bunita programa den otro y a bishita e miembronan invita na nan cas, ya cu nan no tabatin ni cel ni tampoco telefon.

E comision a ripara cu na OPPA tin hopi miembro cu nunca ta asisti n’e actividadnan, vooral esunnan cu ta 80+, cual ta mas cu 300 miembro..

Segun Yamilla Hoevertsz-Kock, miembro di e comision, locual cu a haci pa cuminsa, ta wak cua t’e miembronan 80+ cu no tin number di telefon, cu tampoco tin celular, bay bishita nan, combersa cu nan, puntra nan pakico no ta asisti y si nan tin interes pa un actividad.

P’e motibo aki mes a organisa un English Tea Party, cual e miembronan a haya leuk, aunke hopi di nan no tabatin transporte.

A percura pa transporte p’e miembronan aki. A percura pa nan haya nan cos dushi Arubiano. Tin di bisa cu maske cu e tempo no a coopera, ya cu awa a basha, hopi miembro, door di esey tabatin miedo di presenta. Asina mes e miembronan cu a bin, a pasa masha dushi mes y e comision ta hopi contento cu por a logra pone un sonrisa riba cara di e dama y cabayeronan di 80+ cu si no haci nada pa nan, nan ta keda nan so den cas.

IDEA

Comision Hunto contra Soledad sigur lo bin cu mas actividad. Segun Hoeverstz-Kock, esaki no ta solamente p’e grupo specifico pa 80+, sino pa amplia e grupo. E evento ya menciona tabata un pilot-project pa mira con e acogida ta, cual a resulta di tabata uno hopi bon.

Lo sigui sigur, segun Hoevertsz-Kock. E miembronan di e comision ta varios dama hopi entusiasma. Ta profesional cu a pensionado y a pesar cu nan ta riba 60 aña, nan t’ey ainda y tanten cu por yuda otro, lo haci esaki.

E MIEMBRONAN NA CAS

Segun Hoevertsz-Kock, e comision ta consisti di nuebe persona, cu a purba di yega na mas of menos 50 persona cu ta na cas sin un manera pa comunica. A parti e 50 miembronan aki y a bay bishita nan na cas y wak nan situacion. Tin di bisa cu e miembronan aki tabata hopi contento di topa cu e comision y a habri porta pa nan pa combersa. Mayoria di nan a presenta n’e Tea Party aki.