SPA no kier sinta ni cu minister di husticia ni tampoco minister-president

Algun tempo atras, Sindicato di Polis a manda un carta pa gobierno unda nan ta pidi un reunion cu Conseho di Minister, pa delibera riba e situacion di overtime.

Relaciona cu esaki, presidente di Sindicato di Polis (SPA) a indica cu nan a ricibi un carta unda cu ta informa e sindicato cu nan tin un reunion programa pa dialuna awo, dia 10 di october, cu Minister di Husticia Rocco Tjon. Pero SPA no kier sinta ni cu Minister di husticia ni tampoco minister –president. Ta cu Ministerraad nan kier sinta y no cu un solo persona. Un solo persona no tin e autoridad pa tuma un decision.

Diahuebs un otro carta a bay pa gobierno pa splicanan den nomber di SADA, SPA, SEPPA y TOPA cu nan kier sinta cu Ministerraad. E situacion di overtime ta bay mas aleu, e ta bay pa e siguridad di e pais mes, ya cu no tin suficiente personal riba caya, treciendo Aruba su siguridad na peliger. Aruba mester di su hendenan trahando, pero si corta den overtime of pone timeback, segun e regla di Werktijddienstregeling, mester uza e timeback e luna cu a traha, of pa mas tarda november. Ta haci hopi excepcion cu ta want’e pa varios tempo, pero esey no ta para den ley. Mester uza e timeback sea e luna traha of mas tarda e luna siguiente. No tin polis pa traha, no ta paga overtime y no ta duna timeback

Solognier a sigui bisa cu nan lo mester warda te ora cu baca hoga, pa wak e resultado di e maneho di gobierno. Gobierno ta keda para riba nan 40 ora, pasobra cu no tin placa. Loke gobierno mester compronde cu tur ambtenaar cu ta traha warda, mester keda traha warda. Ta yega un momento cu e maneho ta bay crash. Cu no tin placa ta comprendibel pero mester bin un otro manera den cual gobierno por baha gasto. Tin hopi factor cu por uza pa baha gasto, pero nan ta warda pa nan haya nan reunion cu Ministerraad pa nan trece esaki dilanti.