Songo Music pronto cu un ‘montuno’ pa bo gosa: Despues di 25 aña Harrold Koolman ta bek den studio

Durante fin di siman a yega di sorpresa cerca e integrantenan di e Banda Songo Music, cu ta den pleno grabacion di un produccion den un bachi nobo. Por a aprecia nan presentacion riba diabierna, caminda cu e publico sin duda algun a gosa sin fin di tema y ritmo varia , cu ta locual e banda aki ta trece dilanti.

A topa tambe cu un cara cu no ta desconoci den e mundo di farandula, cual ta Harrold Koolman, cu a confesa cu en berdad despues di 25 aña e ta bek den studio di grabacion pa asina pronto deleita e publico cu su piesa, den un bachi nobo, cu sigur lo cay na agrado di un y tur.

Juni a comparti e intencion y formacion di e banda aki, cu por cierto el a indica cu a cuminsa den un chansa y cu pronto a mira cu a tuma e rumbo di seriedad sin spera. Durante un acercamento di algun di e integrantenan, cu a invit’e pa bin compaña e banda y canta dos piesa cu nan, cu despues a bira un realidad masha agradabel, di por ta den studio grabando locual cu pronto lo bira un exito riba mercado.

A menciona tambe cu, si no ta mayoria practicamente tur integrante di e banda, tabata integrante hopi aña atras di e banda cu tabata hiba e nomber di Original Band. Actualmente a forma e banda nobo aki cu ta carga e nomber Songo Music.

Por cierto palabra di gradicimento ta bay na e propietarionan di e banda, esta Francis y Erick Henriquez pa sostene e iniciativa aki. Musica ta lago cu no ta sali zomaar for di bo sanger, ta locual cu Harrold a indica. A purba di retira y aleha su mes di farandula pero ora bo ta artista/cantante e ta masha dificil pa laga esaki completamente atras.

Pa locual ta trata e cancion cu ta bezig cu ne den studio, ta un tema produci mas di trinta aña pasa pero cu awo ta haya chens di bin bek cu ne pero e biaha aki den un estilo diferente. A presenta e oportunidad y a acera un primo, cual ta propietario di e studio nobo caminda nan ta grabando aden, Diego Henriquez pa asina por haci e produccion aki posibel.

Un studio cu a ricibinan como e prome artista/banda pa graba aden. Pa locual ta trata e cancion, esaki lo ta den estilo Montuno/Somontuno e biaha aki, tabata un piesa cu den su tempo Original Band a presenta. Dedica na e bailadonan, na e publico y muy special na e fanaticada di Songo Music cu ta “Bailadores” y ta bin di decada caminda cu e piesanan aki lo yena pista y marca paso.