SOGA desde 2015 ta core cu mayoria gasto di Hulpbestuurskantoor San Nicolas

Den e comunicado di prensa aki, Stichting Onroerend Goed Aruba (SOGA) ta desea di aclarea e  situacion encuanto MFA San Nicolas, como cu recientemente a sali den medionan di prensa cu e  hulpbestuurskantoor a muda pa MFA Savaneta, a consecuencia di e mal estado di e edificio di MFA San Nicolas.  

Na 2015, SOGA a firma contrato cu Gobierno di Aruba pa cu e construccion di 4 MFA y, den caso di San Nicolas, e  renobacion di HBK San Nicolas, cu lo bira e di 5 MFA, cu un presupuesto calcula pa henter e inversion pa tur 5. Trabounan a cuminsa y cada aña siguiente e construccion di un MFA a keda completa den un bario escogi pa  Gobierno di Aruba segun cada programa van eisen. 

Ora MFA San Nicolas su turno a yega, e suma cu a keda no lo  cubri e renovacion segun e progama van eisen pa San Nicolaas. Gobierno di Aruba a pidi SOGA pa presenta algun alternativa pa haci e renobacion di MFA San Nicolas cu un presupuesto mas abou, locual a haci tambe.  Durante e ultimo añanan SOGA a keda presenta plan alternativo, pero un decision riba esaki no a bin. E status na e  momento aki, cu ta data di februari 2021, ta cu Gobierno a acepta e ultimo proposicion na januari 2022. A informa SOGA cu mester presenta e plan na Parlamento pa su aprobacion. 

SOGA ta un fundacion cu tin como meta pa no genera ganashi (not for profit); su  fundacion tabata pa e sirbi como un vehiculo di  inversion pa e instancianan financiero local. SOGA nunca a tuma e edificio di MFA San Nicolas bou di su maneho; esey ta inclui cu no a haña pago di huur pa e edificio aki. Sinembargo, SOGA desde 2015 a cubri e gastonan relata na  entre otro seguro, erfpacht etc. pa cu MFA San Nicolas. SOGA ta lamenta cu e articulo den prensa por duna e  impresion cu SOGA no ta mantene su edificio di MFA San Nicolas, como cu pa añanan largo SOGA ta den  combersacion cu Gobierno di Aruba, pa por finalisa e renobacion di e edificio y entrega na San Nicolas un MFA cu  nan merece.  

E edificionan publico mas resaltante y miho manteni riba nos isla ta forma parti di e portofolio di propiedadnan bou maneho di SOGA. Nan ta sirbi como prueba concreto cu SOGA ta cumpli cu su proposito pa brinda Pais Aruba un  opcion mas cumbiniente y eficiente pa fisicamente acomoda e departamentonan di gobierno. 

Tocante SOGA 

Na 2005 a funda SOGA despues cu Gobierno di Aruba a pidi e ayudo di Aruba Investment Bank N.V. (AIB) y Algemeen  Pensioenfonds Aruba (APFA) pa facilita e vehiculo a traves di cual Pais Aruba por a yega na e edificionan necesario  pa ubica su diferente departamento. Di e manera aki a crea Stichting Onroerend Goed Aruba (SOGA) cu a realisa tres proyecto den su salida. Ta trata di e edificio di Departamento di Impuesto (DIMP)/Departamento di Finanzas na  Camacuri, e edificio di Departamento di Obranan Publico (DOW)/Direccion di Infrastructura y Planificacion (DIP) na  Sabana Blanco y e edificio di Aruba Tourism Authority/Raad van Advies riba L.G. Smith Boulevard. 

Basa riba e resultado positivo, tur gobierno cu a sigui goberna nos pais, a keda den relacion estrecho cu SOGA  durante su existencia di 16 aña pa mas proyecto pa Pais Aruba. Asina, na 2011, a firma un contrato pa e construccion  y mantencion di edificio destina pa e Facilidadnan Multifuncional (MFA). En total SOGA tin actualmente nuebe (9) propiedad cu SOGA a construi o renoba y ta mantene pa un periodo di 25 aña. Na final di e termino aki, ta stipula cu  gobierno lo por re-evalua si ta extende dicho contrato.