SKOA su congreso nacional di enseñansa tabata exitoso

Riba prome di november 2022 a tuma luga e di cinco edicion di ‘het nationaal onderwijs congres’ organisa pa SKOA y De Rolf Groep. E congreso tabata enfoca pa e docente- y cabesantenan di SKOA. E maestronan a pasa un dia yena cu informacion y sesionnan informativo. Ta mas o menos 800 docente y cabesante a participa den e congreso aki cu a tuma luga riba un solo dia pero na diferente localidad. Gran parti tabata na Hilton hotel sigui pa e scolnan mes, Don Bosco y San Martin. Un dia asina ta contribui no solamente pa amplia conocemento relaciona cu educacion pero tambe na desaroyo personal.

“Nos ta kere den groei en ontwikkeling”, asina e director di SKOA Anuesca Baly a duna di conoce durante un entrevista cu representante di Headlines Group, kende ta e cas editorial di 24ora.com y TREMPAN. Den e proceso di crecemento, e docente ta traspasa e conocemento cerca e studiantenan di cual na nan turno ta involucra esaki na e mayornan. Pues, ta haya e triangulo di; alumno, cas y scol ta yega completo.

Apart di e sesionnan riba enseñansa, a enfoca tambe riba presentacion riba ‘mental health’ y stress. E congreso a conta tambe cu presentacion di director di oficina di turismo, Ronella Croes, kende a informa e importancia di enseñansa cu turismo. Referiendo na turismo, e director a informa cu recientemente tur e scolnan di SKOA a participa y ricibi e Aruba Certified Program.  Den cooperacion cu IPA, tambe tabatin un sesion di movecion y salud. E parti teoretico a tuma luga na hotel y djey a sigui cu e parti practico na Centro Deportivo Betico Croes. E docentenan ta bay cas carga cu ‘tips and tricks’

De Rolf Groep ta un partner importante pa SKOA, ta cinco aña pasa cu a cuminsa cu e aliansa aki. Tur cos a cuminsa chikito y awe ta mira riba un bon cooperacion y uno exitoso. Pronto ta sigui conta cu sosten di De Rolf Groep pero tambe cu experto nan local entre otro Departamento di Recurso Humano, Afdeling Begeleiding y IPA. De Rolf Groep a duna e parti di lesamento, rekenen, 21st Century Skills, idioma y mas. Baly na final ta gradici tur cu a contribui na e congreso y tambe na Ronella Croes di ATA.