Presidente di Parlamento
Sra. America-Francisca
Wilheminaplein 4
Presente
Kòrsou, 17 di òktober 2022
Tópiko: Situashon alarmante den Salubridat
Apresiabel sra. Presidente America-Francisca,
Ta lamentabel pa bisa, pero e sektor di salubridat ya pa algun luna ta den problemanan serio. Kuido hospitalario, kasnan di kuido, gastunan di salubridat, rekorte den servisionan médiko, rekorte den remedi, tur ta kosnan ku ta afektá e salú di nos hendenan direktamente. I frakshon di PAR no ta sinti e presensia i guia di e minister di Salubridat den e temanan aki. Kontrario tin un bashí grandi den e maneho di e ministerio aki.
Den komishon fiho di salubridat di Parlamento a palabra ku lo yama un reunion ku minister di salubridat pa deliberá riba e tópiko di kasnan d kuido for di 11 di aprel 2022. Dia 2 di yüni e reunion aki a keda yama i kanselá; i te ku dia di awe e reunion aki, no a keda yamá mas. Ta mustra un falta di seriedat i sentido di urgensia enorme serka e presidente di e komishon fiho di Salubridat i tambe di e Minister responsabel pa salubridat di nos pais.
Ta di vital importansia pa Parlamento deliberá ku minister Pietersz-Janga pa komprondé kua ta su liña di maneho i kua ta e akshonnan konkreto ku e ta tumando den salubridat. Parlamento no por permití pa laga e sektor di kuido keda sin guia, manera e ta na e momentonan aki. Den kuadro di esaki Parlamento ta pidi Presidente di Parlamento, ku sentido di urgensia pa yama un reunion públiko abase di artíkulo 64 di reglamento di òrdu. Ademas invitá e minister responsabel pa Salubridat sra. Pietersz-Janga.
Danki di antemano,
Miembronan di Parlamento, Partido Alternativa Real
