Situacion ta intolerabel: Detencion pa vandalismo riba Community Pool San Nicolas

Polis a presenta net na tempo pa asina topa cu algun di e sospechosonan relaciona cu destruccion lamentabel tumando luga na Community Pool na San Nicolas. Tin di menciona cu esaki no ta ni e prome ni e di dos biaha cu ta presenta pa e tipo di acto aki na e compleho aki.

Na varios ocasion caba a raporta daño grandi cu a keda registra na e localidad pa comunidad aki. E biaha aki e malhechornan no tabatin e mes un suerte. Na momento cu a bati alarma, diferente patruya a sali direccion Community Pool, incluyendo di districto di Santa Cruz, pa asina yega net na tempo y topa cu gran parti di e grupo sospecha di a causa e destruccion.

Esaki a tuma luga den careda di 8:30pm, ora cu a yega eynan y topa cu diferente mucha na careda. A cuminsa un persecucion na pia y un rato despues a logra detene dos di esunnan cu ta sospecha di ta responsabel pa e vandalismo cometi.

Ademas di core pa polis, e grupo aki a dicidi di tira pieda riba polis. Den bon coordinacion cu polis di pariba conhuntamente cu K9 team a logra gara e sospechosonan den e caya patras di e Community Pool. Awo nan ta den problema serio cu husticia y ta spera cu nan a siña nan les.